الەۋمەتتىك ماڭىزدى تاۋارلاردىڭ باعاسىن باقىلاۋ ماقساتىندا الماتى وبلىسىنىڭ اكىمى اماندىق باتالوۆ تالدىقورعان قالاسى راقىشەۆ كوشەسىنىڭ بويىندا ورنالاسقان «Magnum» ساۋدا جەلىسىنىڭ دۇكەنىنە باردى. بۇل جەردە 19 الەۋمەتتىك ماڭىزدى تاۋاردىڭ 18-ءى بار  جانە ولاردىڭ بارلىعى دا تومەن باعادا. بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى. 

«Magnum» ساۋدا جەلىسى فيليالىنىڭ ديرەكتورى لاۋرا ىدىرىسوۆانىڭ ايتۋىنشا، ساۋدا نۇكتەسىندە جالپى بارلىق تاۋارلار جەتكىلىكتى كولەمدە، مۇنداعى ازىق-تۇلىكتىڭ 50%-ءى - وتاندىقونىم، سونىڭ ىشىندە ءسۇت، ءسۇت ونىمدەرى، نان، نان ونىمدەرى، ماكارون جانە كونديتەر ونىمدەرى بار. وبلىستىق باسمەملەكەتتىك سانيتار دارىگەرىنىڭ قاۋلىسىنا سايكەس ساۋدا نۇكتەلەرىندە بارلىق سانيتارلىق تالاپتار مەن ۇيعارىمدار ساقتالىپ وتىر. دەزينفەكتسيالاۋ شارالارى تۇراقتى جۇرگىزىلىپ، قولدى جۋعا ارنالعان سانيتايزەرلەر قويىلعان. كىرەبەرىستە تەپلوۆيزورمەن بارلىق كەلۋشىلەردىڭ دەنە قىزۋى ولشەنەدى.

تالدىقورعاندا «Magnum» ساۋدا جەلىسىنىڭ ەكى دۇكەنى بار. اماندىق باتالوۆ قالانىڭ وڭتۇستىك-باتىستاعى جاڭا تۇرعىن اۋدانىنان تاعى ءبىر دۇكەن اشۋ مۇمكىندىكتەرىن قاراستىرۋدى تاپسىردى:

-  جۇمىستارىڭىزدى جالعاستىرا بەرىڭىزدەر، ءبىز ءوز تاراپىمىزدان بارلىق قولداۋدى كورسەتەمىز. ەڭ باستىسى، تۇرعىندار بارلىق قاجەتتىلىكتەرمەن تولىق كولەمدە قامتاماسىز ەتىلۋى كەرەك. ساۋدا نۇكتەلەرىندە الەۋمەتتىك ماڭىزدى تاۋارلاردىڭ باعاسى مەن ولاردىڭ بار بولۋىنا تۇراقتى باقىلاۋ جاسايمىز. الەۋمەتتىك ماڭىزدى تاۋارلاردىڭ باعاسى مەن ولاردىڭ بولۋىن قامتاماسىز ەتۋگە باعىتتالعان شارالار قابىلدادىق. قازىر «جەتىسۋ» اكك ارقىلى وبلىستاعى ءىرى ساۋدا نۇكتەلەرىمەن جانە اۋىل شارۋاشىلىعى تاۋار وندىرۋشىلەرىمەن كەلىسىمشارت جاسالۋدا، سونىڭ نەگىزىندە كاسىپكەرلەر بانك كەپىلدىگىنە اينالىم قاراجاتىن الا الادى. بۇل قاتاردا«Magnum» ساۋدا نۇكتەلەرىنىڭ دۇكەندەرىنەن باسقا دا نارىقتا بىرنەشە جىلدان بەرى جۇمىس ىستەپ كەلە جاتقان ءىرى جانە ورتا دۇكەندەر بار. بۇگىنگى كۇنى بۇل ماقساتقا وبلىس بيۋدجەتىنەن ءبىز 1 ملرد. تەڭگە بولدىك. قوسىمشا تاعى 1 ملرد. تەڭگە ءبولۋدى جوسپارلاپ وتىرمىز، - دەدى ا. باتالوۆ. سول سياقتى كاسىپكەرلىك جانە يندۋستريالدى-يننوۆاتسيالىق دامۋ باسقارماسى مەن «جەتىسۋ» اكك باسشىلارىنا الەۋمەتتىك ماڭىزدى تاۋارلاردىڭ باعاسىن تۇراقتى قاداعالاۋدى تاپسىردى.

ساقبەك مايا

"The Qazaq Times"