پرەزيدەنت توقاەۆتىڭ جارلىعى بويىنشا گۇلشارا ابدىقالىقوۆا قىزىلوردا وبلىسىنىڭ اكىمى قىزمەتىنە تاعايىندالدى.

وسى ۋاقىتقا دەيىنگى ءوڭىر باسشىسى بولعان قۋانىشبەك ىسقاقوۆ پرەزيدەنت جارلىعىمەن ورنىنان بوساتىلدى.

54 جاستاعى گۇلشارا ابدىقالىقوۆا قىزىلوردا وبلىسىنىڭ تۋماسى. ول جامبىل اتىنداعى جەڭىل ونەركاسىپ تەحنولوگياسى ينستيتۋتىن "ەكونوميست" ماماندىعى بويىنشا تامامداعان. ۇزاق جىلدار بويى ەڭبەك مينيسترلىگىندە ۆيتسە-مينيستر، 2009-2012 جىلدارى وسى ۆەدومستۆونىڭ ءمينيسترى، 2013-2014 جىلدارى ۆيتسە-پريمەر، 2014-2019 جىلدارى مەملەكەت حاتشىسى، كەيىننەن پرەمەر-مينيستر ورىنباسارى، 2019 جىلدان بەرى ماجىلىستەگى الەۋمەتتىك-مادەني دامۋ كوميتەتىنىڭ باسشىسى قىزمەتىندە بولعان.

پرەزيدەنت كەڭەسشىسى ايدا بالاەۆا گۇلشارا ابدىحالىقوۆانىڭ وبلىس اكىمى بوپ تاعايىندالۋى ەلىمىزدىڭ تاريحىندا ەلەۋلى وقيعا بولدى دەپ سانايدى. بالاەۆانىڭ ايتۋىنشا، "ايەل باسشى بولا المايدى دەگەن ستەرەوتيپ ەندى جوق". بۇل پىكىرىن ايدا عالىمقىزى فەيسبۋك پاراقشاسىندا، ارينە، ورىس تىلىندە جازدى.

"گۇلشارا ابدىحالىقوۆانىڭ قىزىلوردا وبلىسىنىڭ اكىمى بوپ تاعايىندالعانى ەلىمىز ءۇشىن تاريحي وقيعا بولدى. تۇڭعىش رەت ايەل ادام ايماق تىزگىنىن قولىنا الدى. مەنىڭشە بۇل مەريتوكراتياعا قاراي جاسالعان باستى قادام، جىنىسىنا، الەۋمەتتىك جاعدايىنا قاراماستىن لايىقتى ادامدار بيلىككە كەلەدى. ايەل وبلىسقا باسشى بولا المايدى دەگەن ستەرەوتيپ ەندى جوق", - دەيدى ول.

تاۋەلسىز قازاقستاننىڭ تاريحىندا العاشقى ايەل باسشى رەتىندە گۇلشارا ابدىقالىقوۆانىڭ كەلۋىن كوپشىلىك "جۋىردا پرەزيدەنت ايەل بولۋىنىڭ" العىشارت سيگنالى دەپ باعالاپ جاتىر. بۇعان دەيىن اليا نازارباەۆا پروديۋسەرلىك ەتكەن "توميريس" تاريحي ءفيلمى دە قوعام اراسىندا ءارتۇرلى ديسكۋسسيا تۋعىزىپ ەدى.

البەتتە، قازاقستان كونستيتۋتسيا بويىنشا ۋنيتارلى ءارى دەموكراتيالىق باعىتتاعى زايىرلى مەملەكەت. بىراق سولشىل بەلسەندىلەر مەن ازاماتتىق قوعام وكىلدەرى الەۋمەتتىك جەلىلەردە مۇنىڭ "نازارباەۆتار وتباسى تاقتالاسقا تۇسۋدە" دەگەن قاۋەسەت كۇشەيگەن تۇستا جۇزەگە اسۋىنا كۇمانمەن قارايتىنىن ايتۋدا.

"The Qazaq Times"