جاپونيا پرەمەر-ءمينيسترى سيندزو ابە حالىقارالىق وليمپيادا كوميتەتىنە (حوك) 2020 جىلعى وليمپيادا ويىندارىن كەلەر جىلى وتكىزۋدى ۇسىندى.

سيندزو ابە حوك پرەزيدەنتى توماس باحتىڭ الەمگە تارالعان كوروناۆيرۋس ىندەتىنە بايلانىستى وليمپيادا ويىندارىن كەلەسى جىلعا قالدىرۋ تۋرالى ۇسىنىستى قابىلداعانىن ماقۇلدادى. 2020 جىلعى جازعى وليمپيادا توكيودا 24 شىلدە مەن 9 تامىز ارالىعىندا ءوتۋى كەرەك ەدى.

ەكى تاراپتىڭ كەلىسىمىمەن وليمپيادا ويىندارى كەلەسى جىلعا قالدى.

«وليمپيادا ويىندارى مىندەتتى تۇردە وتەدى. سپورتشىلار جارىسقا جاقسى فورمادا كەلۋى ءۇشىن جانە كورەرمەندەردىڭ قاۋىپسىزدىگى ءۇشىن ءبىز وليمپيادا ويىندارىن شامامەن ءبىر جىلعا  كەيىنگە قالدىرۋ تۋرالى ماسەلەنى قاراستىرۋدى ۇسىندىق»، – دەدى ابە.

«قازىرگى ۋاقىتتا ددۇ-نىڭ بۇگىنگى اقپاراتىنا سۇيەنە وتىرىپ، حوك پرەزيدەنتى جانە جاپونيا پرەمەر-ءمينيسترى توكيو وليمپياداسىن ءبىر جىلعا كەيىنگە شەگەرۋ كەرەك، بىراق 2021 جىلدىڭ جازىنان كەشىكتىرمەي وتكىزۋ كەرەك دەپ تۇجىرىم جاسادى»، دەلىنگەن حوك-تىڭ ۆەب-سايتىنداعى حابارلامادا.

ايتا كەتەيىك، COVID-19 ىندەتىنىڭ كەڭ تارالۋىنا بايلانىستى بىرقاتار سپورتتىق جارىستار ۋاقىتشا توقتاتىلدى. بۇعان دەيىن اۆستراليا، كانادا جانە نورۆەگيا قۇرامالارى ەگەر وليمپيادا ويىندارىن كەيىنگە شەگەرمەسە قاتىسۋدان باس تارتاتىنىن ايتقان بولاتىن.

ساقبەك مايا

"The Qazaq Times"