قىرعىزستان استاناسىنىڭ پەرۆوماي اۋدانىنىڭ سوتىندا ەكس-پرەزيدەنت المازبەك اتامباەۆتىڭ قاتىسى بار قوي-تاش اۋىلىنداعى جاپپاي تارتىپسىزدىك تۋرالى ءىستى قاراۋ باستالدى.

مالىمەتتەرگە سۇيەنسەك، بۇل ءىس بويىنشا جالپى 14 ادامعا، ونىڭ ىشىندە پرەزيدەنت اپپاراتىنىڭ بۇرىنعى باسشىسى فاريد نيازوۆقا، ۇلتتىق پارلامەنت دەپۋتاتتارى اسەل قودىرانوۆا مەن يرينا كارامۋشكيناعا ايىپ تاعىلعان. ەلدىڭ بۇرىنعى پرەزيدەنتى سوت عيماراتىنا ۇلتتىق قاۋىپسىزدىك كوميتەتىنىڭ تەرگەۋ يزولياتورىنان جەتكىزىلدى.

2011 جىلدان باستاپ 2017 جىلعا دەيىن قىرعىزستاندى باسقارعان ا.اتامباەۆ 8 تامىزدا قوي-تاش اۋىلىندا ورنالاسقان رەزيدەنتسياسىندا ءبىر تاۋلىككە جۋىق سوزىلعان ارنايى وپەراتسيا كەزىندە قولعا ءتۇستى. سوت ايىپتاۋلارىن مويىنداۋدان بىرنەشە مارتە باس تارتقان اتامباەۆتىڭ جاقتاۋشىلارى پوليتسياعا قارسىلىق كورسەتىپ، قاقتىعىس ورىن الدى. ارنايى جاساق ساربازى كوز جۇمدى. سول كۇنى ۇستالعان ەكس-پرەزيدەنت ۇقكد تەرگەۋ يزولياتورىنا جەتكىزىلدى.

المازبەك اتامباەۆقا قۇقىق قورعاۋ ورگاندارىنىڭ قىزمەتكەرلەرىنە قوقان-لوقى كورسەتتى، جاپپاي تارتىپسىزدىك ورناتتى، كريمينالدى توپ باسشىسى ءازيز باتۋكاەۆقا قولداۋ كورسەتتى، بىشكەك جەو قايتا قۇرۋ كەزىندە جەمقورلىق جاسادى، بىشكەكتەگى «فورۋم» ونەركاسىپ عيماراتىنىڭ باسشىلىعىمەن زاڭسىز مامىلەگە كەلدى جانە ەسىك وبلىسىنداعى قوي-تاش، ىستىقكولدە جەر ۋچاسكەلەرىن زاڭسىز جولمەن الدى دەگەن ايىپتار تاعىلعان. سونىمەن قاتار جوعارىدا اتالعان ايىپتاۋلاردىڭ ىشىندە «ەكس-پرەزيدەنت ادام ولتىرمەك بولدى جانە ادام بوپسالادى» دەگەن ءبولىم دە بار.

"The Qazaq Times"