بۇگىن اقوردادا وتكەن توتەنشە جاعداي جونىندەگى مەملەكەتتىك كوميسسيانىڭ وتىرىسىندا پرەزيدەنت توقاەۆ بىرقاتار ماڭىزدى ماسەلەلەر جونىندە مالىمدەمە جاسادى. 

دۇيسەنبى اق سارايدى جاڭعىرتقان جيىندا پرەزيدەنت وقشاۋلاۋ شاراسى مەن تج كەزىندەگى ەڭبەك نارىعى، مەملەكەتتىك قولداۋ تۋرالى ءسوز ەتتى. ول ساقتىق شاراسىن بارىنشا كۇشەيتۋدى، ءتىپتى كارانتينگە جابىلعان ەكى مەگاپوليسكە جاياۋ جۇرگىنشىنى دە كىرگىزبەۋدى تاپسىردى.

«قازىر الەمدە قاتاڭ كارانتين شارالارىن كەش ەنگىزگەن ەلدەردە كوپ ادام ۆيرۋس جۇقتىردى. ۆيرۋستىڭ كەڭ تاراۋىن توقتاتۋ ءۇشىن جۇرتتى قاتاڭ وقشاۋلاۋ كەرەك. باسقا ەلدەردەن كەلىپ جاتقان جاقسى جانە جاعىمسىز حابارلاردى ەسكەرە وتىرىپ، مەديتسينا جۇيەمىز كەز كەلگەن جاعدايعا دايىن بولۋى كەرەك. ...الداعى ۋاقىتتا وزگە ءىرى اۋماقتاردى جابۋ تۋرالى شەشىم قابىلداۋ كەرەك» دەدى مەملەكەت باسشىسى.

توقاەۆتىڭ ايتۋىنشا، تج ەنگىزىلگەلى (16 ناۋرىز) بەرى اقمولا، اتىراۋ، شقو، قاراعاندى، قوستاناي، پاۆلودار، سقو، تۇركىستان وبلىستارىندا توتەنشە جاعداي ەرەجەسىن بۇزعان 18 دەرەك تىركەلىپ، ولار اكىمشىلىك جاۋاپقا تارتىلعان. وسى سەبەپتى «ەندى ەرەجە بۇزعاندارعا جازانى كۇشەيتۋ قاجەت» دەدى ول.

ەل باسشىسى ارنايى كوميسسيا جيىنىندا قابىلدانعان بىرقاتار شەشىمدەرىن تانىستىردى:

  • 55 جاستان اسقان ازاماتتارعا ۇيدەن شىقپاۋ ۇسىنىلدى;
  • ەلدەگى بارلىق حقكو (حالىق اراسىنداعى اتاۋى تسون – رەد.) تولىق جابىلادى. بىراق ونلاين قىزمەت ءتۇرى توقتامايدى;
  • تج جانە كارانتين رەجيمىن بۇزعاندارعا جازا قاتاڭدايدى;
  • شەتەلدەن كەلگەنىنىڭ ءبارى كارانتينگە جاتادى;
  • دارىگەرلەر مەن پوليتسەيلەرگە جالاقىعا پارا-پار ءبىر رەتتىك سىياقى تولەنەدى;
  • ىندەت سەبەبىنەن جۇمىسى تۇرالاپ، تۇراقتى-نەگىزگى تابىسىنان ايىرىلعان 1,5 ملن ازاماتقا 42,5 مىڭ تەڭگە مەملەكەتتىك جاردەماقى بەرىلەدى;
  • كوپ بالالى وتباسىلار، مۇگەدەكتەر جانە باسقا دا مۇقتاج جاندارعا تەگىن ازىق-تۇلىك تاراتىلادى;
  • تج كەزەڭىندە اۋىل شارۋشىلىعى جانە ازىق-تۇلىك ونىمدەرىنە بەلگىلەنگەن قوسىمشا قۇن سالىعى (ققس) تومەندەتىلەدى;
  • كوپشىلىك جينالاتىن ورىنداردا سانيتارلىق تالاپ كۇشەيەدى;
  • قاشىقتىقتان جۇمىس ىستەۋ تۇرىنە اۋىسقاندىقتان ەلدە ءموبيلدى بايلانىس قىزمەتى مەن ينتەرنەتتى مەيىلىنشە جاقسارادى;
  • قارۋلى كۇشتەر ءۇش مەگاپوليس پەن وزگە ءىرى قالالاردى دەزينفەكتسيالاۋدىڭ ءتارتىبىن بەكىتۋى كەرەك;
  • شاعىن جانە ورتا بيزنەسكە سالىق-تولەم تۇرلەرىن 3 ايعا دەيىن شەگەرۋگە مۇرسات بەرىلەدى;
  • مەكتەپ وقۋشىلارى جانە جاستار ۇيدە وتىرعاندىقتان، ولارعا قىزىقتى ونلاين باعدارلامالار، لەكتسيا كونتەنتى جاسالۋى ءتيىس;
  • دەنساۋلىق ساقتاۋ مينيسترلىگى اۋرۋحانالاردىڭ ساپاسىن كۇندەلىكتى تەكسەرىپ، ولاردىڭ كەز كەلگەن جاعدايعا دايىن بولۋىن قامتاماسىز ەتۋى كەرەك.

داعدارىسقا قارسى مەملەكەتتىك قولداۋدىڭ جالپى جيىنى 4,4 ترلن تەڭگە (10 ملرد دوللار) ەكەنىن حابارلاعان پرەزيدەنت ءسوزىنىڭ كوپ بولىگىن، سۇيەكتى تۇسى ساندىق دەرەكتەردى ورىس تىلىندە ايتتى. العى ءسوزى مەن قورىتىندىسىن عانا، ياعني 6%-ىن عانا (2863 ءسوزدىڭ  170-ءسى) «مەملەكەتتىك تىلدە» جەتكىزدى.

جاۋاپتى ۆەدومستۆو ۇسىنعان سوڭعى رەسمي دەرەك بويىنشا، ەلدە 62 ادامنىڭ كوروناۆيرۋس جۇقتىرعانى انىقتالعان. ولاردىڭ جارتىسى استانادا تىركەلگەن، ەكىنشى بولىگى الماتىدا ەم الىپ جاتىر. سونداي-اق قاراعاندى قالاسىندا ەكەۋ، ال الماتى جانە اقتوبە وبلىستارىندا ءبىر-ءبىر ناۋقاستان تىركەلگەن.

"The Qazaq Times"