كورەيادان شىعىپ كەتكەن جاپونيا باس ەلشىلىگى سەۋلگە قايتىپ ورالدى

جاپونيا ۇكىمەتى ارناۋلى مالىمدەمە جاساپ، ءۇش اي بۇرىن كورەيا استاناسىندا تۋىلعان سوعىس تاريحىن ەسكە الۋ ەسكەرتكىشىنىڭ داۋ-دامايى سەبەبىنەن جاپونياعا قايتارىپ الىنعان باس ەلشىلىك، سەيسەنبى كۇنى سەۋلگە قايتا ورالاتىنىن ايتتى. ماقسات – سولتۇستىك كورەياعا قارسى ىنتىماقتاستىق سەلبەستىكتى نىعايتۋ دەپ كورسەتتى. بۇل تۋرالى «The Wall Street Journal» باسىلىمىنىڭ بۇگىنگى حابارىندا بەلگىلى بولعان ەدى.

جاپونيا سىرتقى ىستەر ءمينيسترى فۋميو كيشيدا (Fumio Kishida) مالىمدەمەسىندە: «جاپونيانىڭ كورەيادا تۇراتىن باس ەلشىلىگى كورەيانىڭ جاڭا ۇكىمەتىنىڭ الداعى ىستەرىمەن بىرگە ىنتىماقتاستىق ىستەرىن جانداندىراتىن بولادى»، – دەدى. اتالعان جاڭا ۇكىمەت كورەياداعى 9 مامىردا بولاتىن پرەزيدەنت سايلاۋىنان كەيىن ورنايدى.

جاپونيا مەن كورەيا اقش-تىڭ شىعىس ازياداعى ەكى نەگىزگى وداقتاستارى. بۇل ەلدەر امەريكا مەن اسكەري قورعانىس ىستەر جاعىندا دا جاڭا ىنتىماقتاستىق-سەلبەستىك شارتتارىنا قول جەتكىزگەن بولاتىن. ءۇش ەل بىرلەسىپ وسى اپتادا ءۇش كۇندىك سۋ استى اسكەري وقۋ-جاتتىعۋلارىن وتكىزەدى. ال ونىڭ باستى ماقساتىن اتالعان ەلدەر سولتۇستىك كورەيانىڭ ءىس-ارەكەتىنە بەرگەن جاۋاپتارى دەپ ءتۇسىندىردى.

وسى قاتارلى جان-جاقتى اسكەري ىنتىماقتاستىقتارعا قاراماستان جاپونيا مەن كورەيا ۇكىمەتى 1945 جىلى جاپونيانىڭ كورەي تۇبەگىنە شاپقىنشىلىق سوعىسى ماسەلەسىنە كەلگەندە ورتاقتاسا الماي كەلەدى. سول كەزدەگى شاپقىنشىلار جاعىنان قورلانعان كورەيالىق ايەلدەرى ماسەلەسى ەكى ەل اراسىندا ۇلكەن داۋ تۋدىرىپ كەلەدى. وسىدان ءۇش اي بۇرىن كورەياداعى جاپون ەلشىلىگى الدىندا، وسى تاريحي وقيعانى ەسكە تۇسىرەتىن، سوعىستا ءجابىر كورگەن كورەيالىق ايەلدىڭ ەسكەرتكىشى ەكى ۇكىمەتتىڭ ساياسي جانجالىن تۋدىرىپ ەدى. ءتىپتى جاپونيا تارابى ءوزىنىڭ باس ەلشىلىگىن كورەيادان قايتارىپ اكەتكەن بولاتىن.

“The Qazaq Times”