11 ناۋرىز بەن 24 ءساۋىر ارالىعىندا Lufthansa نەمىس اۋە كومپانياسى قازاقستانعا رەيستەردى ۋاقىتشا توقتاتتى.

ازاماتىق اۆياتسيا تاراتقان حابارلامادا: «بۇگىنگى كۇنگە دەيىن اۋە كومپانياسى فرانكفۋرت-الماتى-فرانكفۋرت (اپتاسىنا 4 رەت) جانە فرانكفۋرت-الماتى-نۇر-سۇلتان (اپتاسىنا 3 رەت) باعىتتارى بويىنشا تۇراقتى رەيستەردى ورىندادى. الدىن الا اقپارات بويىنشا، اۋە تاسىمالداۋشى وسى باعىتتار بويىنشا ۇشۋلاردى 2020 جىلدىڭ 25 ساۋىرىنەن باستاپ جاڭارتۋدى كوزدەپ وتىر»، — دەلىنگەن.

3 ناۋرىزدان باستاپ قازاقستاننىڭ اۆياتسيالىق اكىمشىلىگى اق بازاسىندا كوروناۆيرۋسقا قاتىستى جاعدايدى باقىلاۋعا باعىتتالعان احۋالدىق ورتالىق جوسپارلى تۇردە جۇمىس ىستەي باستادى. ورتالىقتا قازاقستانعا تۇراقتى جانە تۇراقتى ەمەس اۋە قاتىناستارى بار ەلدەردە ينفەكتسيا جۇقتىرعان ادامداردىڭ ستاتيستيكاسىنا باقىلاۋ جۇرگىزىلمەك.

12 ناۋرىزدان باستاپ قازاقستاندا حالىقارالىق اۋە رەيستەرى قىسقارتىلىپ، ساقتىق شارالارىن كۇشەيتۋ ماقساتىندا قوعامدىق جيىندار كەيىنگە شەگەرىلدى.

"The Qazaq Times"