ازيا بازارىندا مۇناي باعاسى 31 پايىزعا دەيىن ارزاندادى. مۇناي باعاسىنىڭ كۇرت قۇلدىراۋى مۇناي ءوندىرۋشى ەلدەر اراسىنداعى كەلىسپەۋشىلىككە بايلانىستى ەكەنى بەلگىلى. قارا التىندى ءوندىرۋشى ەلدەر مۇناي ءوندىرىسىن قىسقارتۋ تۋرالى كەلىسىمگە كەلە المادى. بۇل بىرقاتار ەلدىڭ ۆاليۋتا جۇيەسىنە كەرى اسەرىن تيگىزبەك.

مۇناي ءوندىرۋشى ەلدەردىڭ وپەك ۇيىمىنا مۇشە الەمدەگى ەڭ ءىرى مۇناي ءوندىرۋشى ساۋد ارابياسى ءساۋىر ايىنان باستاپ مۇنايدىڭ ءار باررەلىنىڭ قۇنىن 6-8 دوللارعا دەيىن ارزانداتاتىنىن جاريالادى. ىلە-شالا Brent ماركالى مۇناي 31 دوللارعا دەيىن ارزاندادى. ناتيجەسىندە، ەڭ اۋەلى اقش دوللارىنا دەگەن رەسەي ءرۋبلدىڭ قۇنى قۇلدىراپ سالا بەردى، رۋبلگە ىلەسە تەڭگەمىزدىڭ دە قۇنى تاعى ارزاندادى.

اقپان ايىنىڭ سوڭىندا Brentت مۇنايىنىڭ باعاسى 50 دوللار شاماسىندا بولاتىن. كەلىسسوزدەر ناتيجەسىز بولعاننان كەيىن 6 ناۋرىز دا 9 پايىزعا ارزانداعان.

بلۋمبەرگتىڭ بەلگىلەۋىندەي مۇناي باعاسىنىڭ مۇنداي كۇرد قۇلدىراۋى 1991 جىلى «شىعاناق سوعىسى» كەزىندە بولعان ەدى. بلۋمبەرگتىڭ ايتۋىنشا وپەك مۇشەلەرى جانە بۇل ۇيىمنان تىس بىرقاتار مۇناي ءوندىرۋشى ەلدەر اراسىنداعى كەلىسسوزدىڭ ناتيجەسىز بولۋى ماسكەۋدىڭ پوزيتسياسى سەبەپ بولدى بولعان. ايتالىق، رەسەي تارابى مۇناي ءوندىرىسىن قىسقارتۋ تۋرالى قوسىمشا شارتتارعا قارسى بولدى.

كەزەكتى كەلىسسوزدەن ناتيجە شىقپاعاننان كەيىن، وپەك كەلىسىم مەرزىمىن جىل سوڭىنا دەيىن شەگەردى. 2020 جىلدىڭ ەكىنشى جارتىسىندا مۇناي ءوندىرىسىن كۇنىنە 1,5 ملن باررەلگە دەيىن قىسقارتۋ تۋرالى ۇسىنىس جاسالعان. بۇعان ماسكەۋ كەلىسپەدى. كەلىسپەيتىن دە سەبەبى بار، ماسكەۋ بۇل شارالار امەريكالىق شيكى مۇناي وندىرىسىنە عانا پايدا الىپ كەلەتىنىن العا تارتۋدا.

راسىندا، مۇناي ءوندىرۋشى ەلدەردىڭ مۇناي ءوندىرىسىن قىسقارتۋى قازىر ىقپالعا يە بولا الماي تۇرعان اقش مۇناي وندىرىسىنە عانا پايدا الىپ كەلۋى مۇمكىن. بۇل مۇنايعا نەگىزدەلگەن جۇيەنىڭ جاڭا ءتارتىبىن ورناتقىسى كەلەتىن قارجىلىق توپتاردىڭ مۇددەسى بولۋى دا عاجاپ ەمەس. ساۋد ارابياسىنىڭ شەشىمى مۇناي باعاسىن قۇلاتقانى راس، بىراق ساۋد پاتشالىعىنىڭ ارقاسىندا امەريكالىق الا بايراقتىڭ تۇرعانىن كىم بىلمەيدى.

الايدا، كەيبىر باتىستىق اگەنتتىكتەر مۇناي باعاسىنىڭ قۇلدىراۋى رەسەيدىڭ بيۋدجەتتىك تاپشىلىعىن كۇشەيتىپ، ونىڭ سوڭى دەۆالۆاتسياعا الىپ كەلۋى مۇمكىن دەپ ەسكەرتتى.

“The Qazaq Times”