قىتاي ءداستۇرلى مەديتسينانى ۆيرۋسقا قارسى پايدالانۋعا جول بەردى. فوتو: CGTN,

كوروناۆيرۋس جانە ونىڭ قاۋپى انىقتالعاننان كەيىن ۆيرۋس جۇقتىرعانداردىڭ اراسىندا جازىلىپ شىققاندار سانى 50 مىڭنان استى، ال سوڭعى 14 كۇندە جازىلىپ شىققاندار سانى ۆيرۋس جۇقتىرعاندار سانىنان كوپ ەكەنى تۋرالى مالىمەتتەر جاريا بولدى. دەگەنمەن، الەم بويىنشا دەنساۋلىق ساقتاۋ ماماندارى ۆيرۋسقا تىكەلەي قارسى تۇرا الاتىن ۆاكتسينانى ءالى تابا العان جوق.

مالىمەتتەرگە قاراعاندا كوروناۆيرۋسقا قارسى پرەپاراتتاردىڭ بىرنەشە نۇسقاسى بار، بىراق ولار ءالى تولىق دالەلدەن وتكەن جوق. بۇل ءۇشىن ءالى دە بىرنەشە اي ۋاقىت ساراپتاۋدان ءوتۋى كەرەك. اقش جانە وزگە ەلدەردىڭ بىرقاتار ۆاكتسينا ءوندىرۋشى الىپتارى تولاسسىز زەرتتەۋ جۇمىستارىن جۇرگىزىپ جاتىر، سولاي دا ولاردان جاعىمدى جاڭالىق جوق.

دارىلەردى اۋرۋلارعا سىناپ كورۋ ءساۋىر ايىنىڭ باس شەنىندە باستالماق. ونىڭ ونىمدىلىگى ودان كەيىن تاعى بىرنەشە اي سىنالاتىن بولادى. دەمەك، بۇل دەرتتى تولىق تىزگىندەيتىن ۆاكتسينانىڭ دايىن بولۋىنا ءالى دە كوپ ۋاقىتتىڭ بار ەكەنىن كورسەتەدى. حابارلارعا سەنسەك، زەرتتەۋ ناتيجەلەرى جىل سوڭىندا بەلگىلى بولۋى مۇمكىن.

قازىرگە دەيىن ۆيرۋس جۇقتىرعان ناۋقاستاردى ەمدەۋ شارالارىنا ارنالعان پرەپاراتتار تەك ۆيرۋستىڭ سالدارىمەن عانا كۇرەسىپ جاتقانى بەلگىلى. جاڭا كوروناۆيرۋستىڭ بەلگىلەرى بۇعان دەيىن دە بەلگىلى بولعان قاۋىپتى كوروناۆيرۋسپەن قاتتى پارىقتى بولمايتىنى دا وعان قارسى تۇرۋ شارالارىنا قيىندىق تۋعىزۋدا. ءتىپتى، جاڭا ۆيرۋستىڭ بەلگىلەرى ساسىق تىماۋ مەن كادىمگى تىماۋدان كوپ پارىقتى بولا بەرمەيدى. تەك، ۋاقىت وتە كەلە سالماعى انىق بولادى.

اۋرۋ وشاعى جانە ەڭ كوپ قازا بولعاندار تىركەلگەن قىتايدا جاڭا ءدارى-دارمەكتەرمەن قوسا قىتايدىڭ ءداستۇرلى ەمشىلىگى دە قاتار قولدانىلىپ جاتىر. سول ەلدىڭ عىلىم-ءبىلىم مينيسترلىگى ۆيرۋسقا قارسى ءداستۇرلى ەمشىلىكتى قولدانۋعا رۇقسات بەرگەن. ەلدىڭ اقپارات قۇرالدارىندا ءداستۇرلى ەمشىلىك ارقىلى دا اۋرۋدى ەمدەپ جاتقان جاعدايلاردىڭ بار ەكەنىن جازۋدا.

“The Qazaq Times”