مەملەكەت باسشىسى قاسىم-جومارت توقاەۆ قىس اۋاسىندا ەل ءىشىن الاتايداي بۇلدىرگەن قورداي قاندى قاقتىعىسى بولعان وڭىرگە دۇنگەن دياسپوراسىمەن كەزدەسۋگە بارعان تۇستا بەلگىلى ادەبيەتتانۋشى-عالىم قۇلبەك ەرگوبەك پرەزيدەنت اتىنا ۇندەۋ جاريالادى. 

پروفەسسور ابدەن قوردالانعان ۇلتتار ساياساتىنىڭ كەمشىلىگىنە ءمان بەرىپ، ماسەلەنى دەر كەزىندە شەشۋ قاجەت دەپ سانايدى.

قازاقستان رەسپۋبليكاسى پرەزيدەنتى ق.ك.توقاەۆقا!

قۇرمەتتى قاسىم جومارت كەمەلۇلى!

ءىس-ساپارمەن جامبىل وبلىسىنا قورداي ماسەلەسىمەن كەلدىڭىز. پرەزيدەنتتىڭ ساپارى ونىڭ حالىققا جاقىندىعىن، مەملەكەتشىلدىگىن كورسەتەدى. سونىمەن بىرگە، پرەزيدەنتتىڭ ساپارى قورداي وقيعاسى جايىندا ويدا قوردالانعان ءتۇيىندى ماسەلەلەردى قوزعايدى. اقورداعا ورالعان سوڭ ەلىمىزدە بولىپ وتكەن كەلەڭسىز قاقتىعىس جايىندا شەشىم الۋىڭىز كەرەك. قوعامنىڭ الدىندا وتىراتىن جازۋشى، عالىم، پرەزيدەنتتىڭ اكەسىمەن ءبىر كابينەتتە وتىرىپ قىزمەت اتقارعان ازامات رايىندا جاناشىرلىقپەن وي سالۋ ءۇشىن پىكىر ايتۋدى ءجون كورىپ وتىرمىن.

  1. دۇنعانداردىڭ استامسۋى قازاقستان رەسپۋبليكاسىندا دياسپورا ماسەلەسىنىڭ بىزدە، دامىعان ەلدەردەگىدەي، تۇبەگەيلى شەشىمىن تاپپاعانىن كورسەتەدى. اسسامبلەيا ينستيتۋتتىق قۇرىلىم رەتىندە ءوزىن اقتامادى دەپ ويلايمىن.
  2. ەگەر، قوردايدا بولعان وقيعادان دۇرىس ساباق الماساق، مەملەكەت ءۇشىن دە، مەملەكەت قۇراۋشى ۇلت – قازاقتار ءۇشىن دە، جالپى دياسپورا ءۇشىن دە دۇرىس بولمايدى. ەرتەڭگى كۇنى مۇنداي وقيعا ءار جەر-ءار جەردە تاعى قايتالانۋى مۇمكىن.
  3. دۇنعان ماسەلەسىن ىسكەر باسشى دەپ وبلىس اكىمى ب.م.ساپارباەۆقا ارتىپ قويۋ – دۇرىس شەشىم ەمەس. وبلىس ەڭسەسىن ەندى-ەندى كوتەرىپ كەلە جاتقان وبلىس. ساياسي جاعىنان كوتەرگەنىمەن، ەكونوميكالىق جاعىنان مۇنداي جۇكتى كوتەرە المايدى دەپ ويلايمىن! ءارى، ولاي ەتۋ – قاستەرلى قارياسىن ساباتقان وبلىس تۇرعىندارى ءۇشىن وڭ شەشىم بولىپ شىقپايدى.
  4. كەلەڭسىز ماسەلەنى الدىمەن اسسامبلەيا ءوز ىشىندە اشىق تالداۋى كەرەك. وقيعا دۇنعان دياسپوراسىنا عانا كولەڭكە ءتۇسىرىپ وتىرعان جوق. ءداستۇرىن ساقتاپ، ءبىلىمىن بەرىپ، مادەنيەتىن وركەندەتىپ وتىرعانىنا قاراماستان، دۇنعان ۇلت وكىلدەرىنىڭ شەت ەلدەن كومەك سۇراۋى، روسسيادا تۇرعىسى كەلۋى قاۋىپتى سيندروم. سوندىقتان دۇنعان ماسەلەسى قازاقستانداعى بارلىق دياسپوراعا كولەڭكە ءتۇسىرىپ كەتتى دەپ ءبىلۋىمىز كەرەك. بۇل وتانىن سۇيگەن ءاربىر ازاماتتى قاتتى ويلاندىرۋعا ءتيىستى. اسىرەسە، دياسپورانى!
  5. دەمەك، دۇنعان استامشىلىعىن بارلىق دياسپورا باسشى، قوسشى بولىپ اسسامبلەيا پرەزيدۋمىندا تالداۋى كەرەك. دۇنعان دياسپوراسى اسسامبلەيادان كەشىرىم سۇراۋى كەرەك. اسسامبلەيا سودان كەيىن بارىپ دياسپوراعا قامقور بولىپ وتىرعان مەملەكەتتەن، مەملەكەت قۇراۋشى،– قازاق حالقىنان كەشىرىم سۇراۋعا ءتيىستى.
  6. ورتەلگەن ءۇي، قيراعان عيماراتتى كىم جوندەۋگە ءتيىستى؟
    ونى دا اسسامبلەيا پرەزيدۋمى شەشۋگە مىندەتتى. ەگەر، مەملەكەت قالپىنا كەلتىرىپ بەرەمىز دەسە، ول كانىگى جالپاقشەشەيلىك بولىپ شىعادى. مەملەكەت حالىقتىڭ قاراجاتىن ءوزىن مەملەكەت ىشىندە ورىنسىز استام ۇستاعان ءبىر دياسپوراعا قيسىنسىز جۇمساعان بولىپ شىعادى. بۇل مەملەكەت ەكونوميكاسىن السىرەتۋ ءۇشىن ادەيى قولدان ۇيىمداستىرىلعان قىلمىسقا اينالىپ شىعا كەلەدى. بۇل – مەملەكەتتىڭ وقيعادان ساباق الماعانى بولادى. مۇنداي شەشىم جالپى حالىقتىڭ نارازىلىعىن تۋدىرادى. ەڭ دۇرىسى قالپىنا كەلتىرۋ جۇمىسىن اسسامبلەيا موينىنا العانى ءجون. وندا دا ويلانۋ كەرەك: جالپى اسسامبلەيا شاڭىراعى استىنا بىرىككەن بارلىق دياسپورا كاسىپكەرلەرى ىنتىماقتاسىپ، تاعدىرلاس تۇتىپ، بىرىگىپ ورتادان قاراجات شىعارىپ جوندەي مە؟ الدە، ءوزارا اقىلداسىپ، ماسەلەنى تالداپ، دۇنعان كاسىپكەرلەرىنىڭ ءوزىنىڭ موينىنا جۇكتەي مە؟ بۇل اسسامبلەيا شەشۋگە ءتيىستى ماسەلە!
  7. قازاقتىڭ ءتىلىن دياسپوراعا قازاقستاننىڭ قاراجاتى ەسەبىنەن مىندەتتەۋ – قاتە! دياسپورا ما، مەملەكەت قۇراۋشى ۇلت پا، قازاق ءتىلىن مەملەكەتتىك ءتىل رەتىندە تازا بىلۋگە، تۇرمىستا، قوعامدا، بار قوعامدىق سالادا تۇتىنۋ – قازاقستان ازاماتتارىنىڭ مىندەتى! مەملەكەتتىك ءتىلدى ءبىلۋ – مەملەكەت قارجىسىنان ەمەس، مەملەكتتىك ءتىلدى بىلمەيتىندەر ەسەبىنەن قارالۋى ءتيىس!
  8. مەملەكەتتەن بار جاقسىلىق پەن ىزگىلىكتى كورە وتىرىپ، شەت ەلمەن استىرتىن بايلانىس ورناتۋ، كومەك سۇراۋ – مەملەكەتىمىزگە جاسالعان وپاسىزدىق جانە ساتقىندىق رەتىندە قارالۋعا ءتيىستى!

سىزگە دەگەن شىنايى قۇرمەتپەن، قۇلبەك ەرگوبەك،
جازۋشىلار وداعى باسقارما مۇشەسى، حالىقارالىق الاش سىيلىعىنىڭ لاۋرەاتى، حالىقارالىق اكادەميالار مۇشەسى، پاراسات وردەنىنىڭ يەگەرى، قر پرەزيدەنتى ستيپەنديانتى.تۇركولوگ پروفەسسور.

تۇركستان. 1.03.2020

"The Qazaq Times"