الماتىداعى جەلتوقسان كوشەسى. فوتو: QT.

الماتى قالاسىندا پوليتسيا "رەسپۋبليكا" جانە "استانا" الاڭدارىنىڭ ماڭىن قورشاپ تۇر. اتالعان اۋماقتاردا ۇيالى بايلانىس وپەراتورلارىنىڭ ينتەرنەت قىزمەتى دە بۇعاتتالعان. 

بۇدان بۇرىن ەلىمىزدەگى بىرقاتار قوعامدىق ۇيىمدار مەن قوزعالىستار، جاڭا پارتيالار نارازىلىق شاراسىن وتكىزەتىنىن بىلدىرگەن. ولاردىڭ قاتارىندا قازاقستاندا ەكسترەميستىك ۇيىم رەتىندە شەكتەلگەن "قازاقستان دەموكراتيالىق تاڭداۋى" قوزعالىسى جانە ءالى تىركەلىپ ۇلگىرمەگەن "دەمپارتيا" دا بار. سونداي-اق، نارازىلىق شاراسىنا "رەسپۋبليكا", "ويان قازاقستان" قوزعالىستارى دا قولداۋ كورسەتكەن.

وسىعان بايلانىستى الماتى قالاسىندا پوليتسيا الاڭداردى جانە سوعان جاقىن اۋماقتى قورشاۋعا الدى. جاياۋ جۇرگىنشىلەردىڭ وتۋىنە دە تىيىم سالدى. ۇيالى بايلانىس جەلىسىنىڭ بۇعاتتالۋىنا بايلانىستى Kcell  جانە Beeline بايلانىس وپەراتورلارىنا حابارلاسىپ سۇراعانىمىزدا، ەل ورتالىعى مەن الماتى قالالارىندا قۇزىرلى ورگاندار تارابىنان ۇيالى بايلانىس جەلىسىنىڭ بۇعاتتالعانىن ايتتى.

تىلشىلەرىمىزدىڭ حابارىنا قاراعاندا، پوليتسيا الاڭعا جاقىن ماڭدا بارلىق جۇرگىنشىلەردىڭ وتۋىنە شەكتەۋ قويعان. جۋرناليستەردى دە بىرنەشە رەت قاتاڭ تەكسەرۋدەن وتكىزگەن. اراسىندا قىزمەتتىك تاپسىرماسى جوق دەگەن ايىپپەن انار اققوزىنى ۇستاماق بولعانى جانە اسەل جاڭاباي ەسىمدى ءجۋرناليستى ۇستاعانى ءمالىم بولدى. سونداي-اق، تىلشىلەرىمىزدەن بەلگىلى جۋرناليست، "دات" جوباسىنىڭ جەتەكشىسى ەرمۇرات باپي دا پوليتسيا تارابىنان ۇستالعانى تۋرالى مالىمەت كەلىپ ءتۇستى.

ارىپتەستەرىمىز، ەرمۇرات باپيدىڭ ۇستالعانى تۋرالى وقيعا ورنىندا باقىلاپ تۇرعان الماتى پوليتسيا دەپارتامەنتىنىڭ ءباسپاسوز قىزمەتىنىڭ وكىلدەرىنەن سۇراستىرعان. بىراق، ولار بۇل تۋرالى "بىلمەيتىنىن" ايتقان. جۋرناليستەر سول ماڭدا ەرمۇرات باپيدىڭ "105752" نومەرىندەگى پوليتسيا ارنايى كولىگىنە وتىرعىزىلعانىن انىقتاعانىمەن، پوليتسيا قىزمەتكەرلەرى بۇل مالىمەتتە جوققا شىعارعان جانە جۋرناليستەردىڭ ارنايى كولىكتى تۇسىرۋىنە قارسى بولعان.

“The Qazaq Times”