دۋلات اعادىل ءولىمى: رەسمي نۇسقانىڭ كۇماندى ەكى تۇسى

وسىدان ءۇش كۇن بۇرىن قوعام بەلسەندىسى دۋلات اعادىلدىڭ استانادعى تەرگەۋ يزولياتورىندا قايتىس بولۋى ەل ىشىندە ۇلكەن رەزونانس تۋدىردى. بيلىككە كوڭىلى تولمايتىن، قۇقىق قورعاۋ ورگاندارىنا سەنىمى سەتىنەگەن نارازىلار قاتارى كوبەيگەندەي.

كەشە مارقۇمنىڭ سۇيەگىنە كىرگەن استانالىق تۇرعىننىڭ ءبىرى قايىرجان يمانعاليۇلى باق-قا بەرگەن كوممەنتاريىندە «بايقاعانىم، ولار دۋلاتتى ۇرعان. ءمايىتحانانىڭ وزدىگىنەن ءولدى دەگەنىنە كەلمەيدى. جۇرەگىنىڭ تۇسىنان ۇرعان كوگەرگەن ءىز بار. قازىر قازىپ الساڭدار دا كەش ەمەس. مەن تاريحتا ەرتەڭ قارىز بولىپ قالمايىن دەپ ايتىپ وتىرمىن» دەپ اعىنان جارىلدى. سونىمەن قاتار Facebook الەۋمەتتىك جەلىسىندە «دۋلات اعادىلدىڭ قاماۋدان كەيىنگى احۋالى» دەپ تاراعان ۆيدەودا كۋاگەرلەر ارقا جاۋىرىن تۇسى مەن اياق سانىنىڭ كوگەرىپ-قارايعانى كورىنەدى.

كۋاگەردىڭ ازاتتىققا ايتۋىنشا، سۇيەككە كىرگەن تالاپكەر اۋىلىنداعى مەشىت يمامى مەن تاعى ءبىر ادام، ءوزىن قوسقاندا ءۇش ادام دا مارقۇمنىڭ دەنەسىندەگى كوگەرگەن تۇسىن بايقاعان.

بىراق مارقۇمنىڭ اعاسى قانات اعادىل ونىڭ دەنەسىندە كوگەرگەن، سوققى تيگەن بەلگى بولماعانىن ايتقان.  بۇعان دەيىن ىشكى ىستەر ءمينيسترىنىڭ ورىنباسارى ارىستانعالي زاپپاروۆ جەدەل جاردەم دارىگەرى دۋلاتتىڭ «دەنەسىن قاراۋ كەزىندە زورلىق-زومبىلىق جاراقاتى انىقتالمادى» دەگەن ەدى.

دۋلات اعادىلدىڭ «...سوتتالۋعا دا دايىنمىن. ءولتىرىپ تە، ۇرىپ تا، پىشاقتاپ تا كەتۋى مۇمكىن. مۇنى ىستەسە، ارنايى قىزمەتتەر عانا ىستەيدى. كوشەدەگى بىرەۋ ىستەمەيدى. ويتكەنى مەن كوشەدە بەتالدى جۇرمەيمىن، اراق ىشپەيمىن، تەمەكى شەكپەيمىن، باسقا بىرەۋدىڭ الا ءجىبىن اتتاعان ەمەسپىن، ۇرلىق جاسمايمىن. سوندىقتان مۇنداي اڭگىمەلەر بولىپ جاتسا، سابىرلىق ساقتاپ سەنبەڭىزدەر» دەپ بيلىكتىڭ ارنايى كۇشتىك قۇرىلىمىنان سەزىكتەنەتىن ءارى قاستاندىق جاسالۋى ىقتيمال ەكەنىن ايتقان بەينەۇندەۋى ينتەرنەتتە تاراعان.

اتالعان دەرەكتەرگە نازار اۋدارار بولساق، ءىىم مالىمدەگەندەي «كۇش كورسەتۋ ورىن الماعان» جانە «ىشىمدىك ىشكەن» دەگەن ءۋاج كۇمان تۋدىرادى. الەۋمەتتىك جەلى قولدانۋشىلارى مەن دۋلات اعادىلدىڭ قازاسىن ازا تۇتقان استانا، الماتى، شىمكەنت، اقتوبە، ورال، تاراز قالالارىنا جينالعان بەلسەندىلەر ونى جۇرەكتەن قايتتى دەگەن «رەسمي نۇسقاعا» سەنبەيتىنىن، بۇرىن-سوڭدى دەنساۋلىعىنا قاتىستى شاعىمى بولماعانىن ايتادى.

ازاماتتىق بەلسەندى سوڭعى پىكىرىندە نازارباەۆتار اۋلەتىندەگى «شيەلەنىستەر» تۋرالى ءارى بەكبولات تىلەۋحان، مۇحاممەدجان تازابەكوۆ، ابدۋعاپپار سمانوۆ ەسىمدى ءدىني تۇلعالاردىڭ اتىنا وتكىر ەسكەرتۋ-ۇندەۋ جاساعان بولاتىن. سوڭعى التى ايدا دۋلات ازاماتتىق بەلسەندىلىگىنە بايلانىستى ون شاقتى رەت اكىمشىلىك جازاعا تارتىلىپ، كەم دەگەندە 60 تاۋلىك اباقتىدا وتىرعان. ونى بىرنەشە كۇن قاتارىنان قتكەن قارالى جيىنداردا ەسكە العان كوپشىلىك «ادىلەتسىزدىككە، ساياسي جۇيەنىڭ كەرەاعار جازىلماعان زاڭىنا قارسى كۇرەسكەن» قايراتكەر رەتىندە باعالايدى.

“The Qazaq Times”