Körneki suret. Foto: aşıq derekköz

Osıdan üş kün bwrın qoğam belsendisi Dulat Ağadildiñ astanadğı tergeu izolyatorında qaytıs boluı el işinde ülken rezonans tudırdı. Bilikke köñili tolmaytın, qwqıq qorğau organdarına senimi setinegen narazılar qatarı köbeygendey.

Keşe marqwmnıñ süyegine kirgen astanalıq twrğınnıñ biri Qayırjan Imanğaliwlı BAQ-qa bergen kommentariyinde «bayqağanım, olar Dulattı wrğan. Mäyithananıñ özdiginen öldi degenine kelmeydi. Jüreginiñ twsınan wrğan kögergen iz bar. Qazir qazıp alsañdar da keş emes. Men tarihta erteñ qarız bolıp qalmayın dep aytıp otırmın» dep ağınan jarıldı. Sonımen qatar Facebook äleumettik jelisinde «Dulat Ağadildiñ qamaudan keyingi ahualı» dep tarağan videoda kuägerler arqa jauırın twsı men ayaq sanınıñ kögerip-qarayğanı körinedi.

Kuägerdiñ Azattıqqa aytuınşa, süyekke kirgen Talapker auılındağı meşit imamı men tağı bir adam, özin qosqanda üş adam da marqwmnıñ denesindegi kögergen twsın bayqağan.

Biraq marqwmnıñ ağası Qanat Ağadil onıñ denesinde kögergen, soqqı tigen belgi bolmağanın aytqan.  Bwğan deyin işki ister ministriniñ orınbasarı Arıstanğali Zapparov jedel järdem därigeri Dulattıñ «denesin qarau kezinde zorlıq-zombılıq jaraqatı anıqtalmadı» degen edi.

Dulat Ağadildiñ «...sottaluğa da dayınmın. Öltirip te, wrıp ta, pışaqtap ta ketui mümkin. Mwnı istese, arnayı qızmetter ğana isteydi. Köşedegi bireu istemeydi. Öytkeni men köşede betaldı jürmeymin, araq işpeymin, temeki şekpeymin, basqa bireudiñ ala jibin attağan emespin, wrlıq jasmaymın. Sondıqtan mwnday äñgimeler bolıp jatsa, sabırlıq saqtap senbeñizder» dep biliktiñ arnayı küştik qwrılımınan seziktenetin äri qastandıq jasaluı ıqtimal ekenin aytqan beyneündeui internette tarağan.

Atalğan derekterge nazar audarar bolsaq, İİM mälimdegendey «küş körsetu orın almağan» jäne «işimdik işken» degen uäj kümän tudıradı. Äleumettik jeli qoldanuşıları men Dulat Ağadildiñ qazasın aza twtqan astana, Almatı, Şımkent, Aqtöbe, Oral, Taraz qalalarına jinalğan belsendiler onı jürekten qayttı degen «resmi nwsqağa» senbeytinin, bwrın-soñdı densaulığına qatıstı şağımı bolmağanın aytadı.

Azamattıq belsendi soñğı pikirinde Nazarbaevtar äuletindegi «şielenister» turalı äri Bekbolat Tileuhan, Mwhammedjan Tazabekov, Abduğappar Smanov esimdi dini twlğalardıñ atına ötkir eskertu-ündeu jasağan bolatın. Soñğı altı ayda Dulat azamattıq belsendiligine baylanıstı on şaqtı ret äkimşilik jazağa tartılıp, kem degende 60 täulik abaqtıda otırğan. Onı birneşe kün qatarınan qtken qaralı jiındarda eske alğan köpşilik «ädiletsizdikke, sayasi jüyeniñ kereağar jazılmağan zañına qarsı küresken» qayratker retinde bağalaydı.

“The Qazaq Times”