نارازىلار الماتى اكىمى باقىتجان ساعىنتاەۆتىڭ شىعۋىن تالاپ ەتىپ جاتىر

الماتىدا نارازىلار قالا پروكۋرورىنان جاۋاپ الا الماعان سوڭ اكىمدىك عيماراتىنىڭ الدىنا بارىپ، اكىم باقىتجان ساعىنتاەۆتىڭ شىعۋىن، حالىق تالابىن ورىنداۋىن تالاپ ەتىپ تۇر.  

50-گە تارتا بەلسەندى «ميتينگكە جينالماعانىن» ءارى پرەزيدەنتتىڭ اتىنا «توقاەۆ ۇسىنعان «حالىق ۇنىنە قۇلاق اساتىن مەملەكەت» تۇجىرىمىن جەرگىلىكتى بيلىك ىسكە اسىرمايتىنىن، باسشى رەتىندە قادىرسىزدىك تانىتاتىنىن» ايتىپ  ەسكەرتتى. «ساعىنتاەۆ، شىق!»، «بوستاندىق!»، «حالىقتان نەگە قورقادى؟» دەپ ۇرانداسقان جۇرتتىڭ الدىنا ارنايى جاساق كەلىپ، اكىمدىك الدىن كۇزەتىپ تۇر.

الماتى قالاسىنىڭ ىشكى ساياسات باسقارماسىنىڭ باسشىسى ايدار ەسەنبەكوۆتىڭ ۋاجىنە ەشكىم قۇلاق تۇرمەدى. ولار 22 اقپان سانكتسيالانباعان ميتينگتە ۇستالعان 18 ازاماتتى اباقتىدان دەرەۋ بوساتۋدى ءارى ەكى كۇن بۇرىن تۇرمەدە قازا بولعان ازاماتتىق بەلسەندى دۋلات اعادىلدىڭ ءولىمىن  ادىل تەكسەرۋدى تالاپ ەتۋدە.

قالا اكىمى باقىتجان ساعىنتاەۆ ادەتتەگىدەي (قىركۇيەكتەن بەرى) نارازى توپتىڭ الدىنا شىقپادى.

جينالعاندار دۋلات اعادىلدىڭ ولىمىنە تىكەلەي بيلىك كىنالى،  بيلىك بۇل ارقىلى قوعام بەلسەندىلەرىن قورقىتۋدى كوزدەپ وتىر،  بيلىككە قارسى شىقپاۋعا كوندىرگىسى كەلەدى دەپ سانايدى. سوڭعى بەينەۇندەۋىنىڭ بىرىندە «ءوزىنىڭ ىشىمدىك ىشپەيتىنىن، تەمەكى تارتپايتىنىن، بيلىك كەز كەلگەن ادىسپەن ءولتىرۋى مۇمكىن ەكەنىن» ەسكەرتكەن دۋلات اعادىلدىڭ بەلسەندىلەر ونىڭ بۇرىن سوڭدى «جۇرەك تالماسىمەن» اۋىرماعانىن ايتادى.

بۇگىن اقمولا وبلىسىنداعى اعادىلدى سوڭعى ساپارعا شىعارىپ سالعان تۇستا اقتوبە، الماتى، شىمكەنت جانە تارازدا بەلسەندىلەر مارقۇمدى ەسكە الىپ, ازاماتتىق بەلسەندىلەردى قۋعىنداۋدى توقتاتۋدى جانە بيلىكتىڭ تۇگەلدەي اۋىسۋىن تالاپ ەتتى.