قىرعىزستاننىڭ بۇرىنعى پرەزيدەنتى المازبەك اتامباەۆ پەن ونىڭ جاقتاستارىنا «مەملەكەتتىك توڭكەرىس جاساماق بولدى»، قوعامدىق تارتىپسىزدىك ورناتتى دەگەن ايىپ تاعىلدى. بۇل تۋرالى قىرعىزستان سوتسيال-دەموكراتيالىق پارتياسىنىڭ (سدپ) رەسمي وكىلى كۋندۋز جولدىباەۆا مالىمدەدى.

«بۇگىن پروكۋراتۋرا قوي-تاش وقيعاسىنا بايلانىستى قىلمىستىق ءىس بويىنشا تاعىلعان ايىپتاردى رەسمي تۇردە جاريالادى. باس پروكۋرور وتكۋربەك جامشيتوۆ 491 بەتتەن تۇراتىن ايىپتاۋ قورىتىندىسىن بەكىتتى»، — دەدى رەسمي وكىل.

اتامباەۆتان باسقا بۇل قىلمىستىق ءىس بويىنشا تاعى 13 ادام، ولاردىڭ قاتارىندا جولدىباەۆتىڭ ءوزى، پرەزيدەنت اپپاراتىنىڭ بۇرىنعى باسشىسى فاريد نيازوۆ، سونداي-اق ۇلتتىق پارلامەنتتىڭ دەپۋتاتتارى اسەل كودۋرانوۆا مەن يرينا كارامۋشكينا بار.

بىلتىر 7 تامىزدا قىرعىزستاننىڭ ارنايى جاساعى اتامباەۆتى ۇستاۋ بويىنشا ارنايى وپەراتسيا باستاعان. ول اتامباەۆتىڭ قوي-تاش اۋىلىنداعى ۇيىندە جۇرگىزىلگەن بولاتىن. وپەراتسيا كەزىندە تاراپتار ءبىر-بىرىنە رەزەڭكە وق اتىپ، سالدارىنان ارنايى جاساق وكىلى قازا تاپتى. 45 ادام اۋرۋحاناعا ءتۇستى.

ءبىرىنشى وپەراتسيا ناتيجەسىز اياقتالعان سوڭ، 8 تامىز تۇستەن كەيىن ۇلتتىق قاۋىپسىزدىك كوميتەتىنىڭ ارنايى جاساعى ەكىنشى وپەرتسيانى باستاعان. قىرعىزستان دەنساۋلىق مينيسترلىگى ەكىنشى رەت ورىن العان جانجال كەزىندە بەس ادام جارالانعانىن حابارلادى. ونىڭ تورتەۋى - پوليتسەي.

27 ماۋسىمدا قىرعىزستان پارلامەنتى المازبەك اتامباەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. جوعارى كەڭەستە قۇرىلعان ارنايى كوميسسيا ەكس-پرەزيدەنت المازبەك اتامباەۆقا جەمقورلىققا جول بەردى، قىزمەتىن اسىرا پايدالاندى سىندى پۋنكتتەر بويىنشا بەس ايىپ تاعىپ وتىر. قىرعىزستان ىشكى ىستەر مينيسترلىگىنىڭ تەرگەۋ توبى جاۋاپ الۋ ماقساتىندا ءۇش رەت شاقىرعان. دەگەنمەن، ۇشەۋىنە دە بارۋدان باس تارتقان اتامباەۆ كونستيتۋتسيالىق پالاتاعا حات جولداعان.

"The Qazaq Times"