بۇگىن ءتۇس كەزىندە، ساعات 14:00-15:20 ارالىعىندا الماتى قالاسىنىڭ ورتالىعىنداعى «استانا» الاڭىنىڭ اۋماعىندا ەلدە تىيىم سالىنعان «قازاقستاننىڭ دەموكراتيالىق تاڭداۋى» بەيرەسمي قوزعالىسىنىڭ سانكتسيالانباعان ميتينگىندە كەمى ءجۇز شاقتى ازامات ۇستالدى.

ءبىر ايدان بەرى الەۋمەتتىك جەلىلەردە ەكس-بانكير، قۋعىنداعى وپپوزيتسيالىق ساياساتكەر مۇحتار ءابليازوۆ جەتەكشىلىك ەتەتىن، ەلدە ەكسترەميستىك ۇيىم رەتىندە تانىلىپ،  قىزمەتىنە تىيىم سالىنعان «قازاقستاننىڭ دەموكراتيالىق تاڭداۋى» قوزعالىسى ينتەرنەت ارقىلى ازاماتتاردى 22 اقپانعا جاپپاي ميتينگىگە شاقىرىپ كەلگەن بولاتىن.

جۇزدەگەن جەرگىلىكتى قۇقىق قورعاۋ ورگانىنىڭ وكىلدەرى باقىلاعان اۋماقتا ينتەرنەت بۇعاتتالعان. جيىن كەزىندە كاسىپورىندار مەن قوعامدىق تاماقتانۋ ورىندارى جابىق بولدى. اكىمدىك قىزمەتكەرلەرى كەزەك-كەزەك ابىلاي حان جانە بۇرىنعى فۋرمانوۆ، سونداي-اق قازىبەك بي-تولە بي كوشەلەرىنىڭ اۋماعىندا جۇرگەن ازاماتتارعا تاراۋىن سۇراپ، ەسكەرتۋ جاسادى. ءتىپتى پوليتسەيلەر «جاياۋ جۇرگىنشىمىن» دەگەن ونداعان ادامنىڭ ۋاجىنە قاراماستان، كۇشتەپ اۆتوزاكقا سالىپ اكەتتى.

اسكەريلەر جاس-كارىسىنە قاراماي، ءبارىن توپ رەتىندە جابىلا ءجۇرىپ، كەيبىرىنە كۇش كورسەتىپ ۇستادى. ءبىر ومون اقساقالدىڭ قولىن قىمتاپ، ەكى قولىمەن قىسىپ كوتەرىپ الىپ كەتتى. سونىمەن قوسا ارباتتىڭ جوعارى بولىگىندە مۇگەدەك اراباسىنا تاڭىلعان جۇماباەۆ ەرىك اينالاسىنا ۇيمەلەگەن قالىڭ اسكەريلەرگە «ديكتاتۋرالىق تيرانيانىڭ زاردابى»، «بولاشاق ءۇشىن كۇرەسۋ» تاقىرىبىندا «ءدارىس وقىعان» سوڭ، ءبىر توپ جاساق ارباسىمەن بىرگە كوتەرگەن كۇيى جەدەل جاردەم كولىگىنە سالىپ اكەتتى. ۇستالعانداردىڭ كەيبىرى «قۇرتتاعان بيلىك قۇرىسىن!»، «مۇحتار جاكىشەۆكە بوستاندىق»، «كرەسلوعا جابىسىپ قالعان ەشكىم جوق، بيلىك ءبىر رەت بولسىن اۋىسسىن دا!»، «دەموكراتيا»، «بوستاندىق» دەپ ۇرانداپ ايقايلادى.

تۇسكە دەيىن ءدال وسى ماڭدا دەمپارتيانىڭ باستاماشىل توبىنىڭ ءجۇز شاقتى جاقتاستارى ۇستالعانى حابارلانعان بولاتىن.

بۇل كۇنى شىمكەنت، تاراز، اقتوبە، استانادا ميتينگ وتەدى دەپ بەلگىلەنگەن جەرگە كەلگەن بەلسەندىلەردى پوليتسيا ۇستاپ جاتىر. جەر-جەردە ۇستالعاندار «نازارباەۆ كەتسىن!»، «شال، كەت!» دەپ ۇرانداتتى. شىمكەنتتەگى تاۋەلسىزدىك ساياباعىندا كۇزەت كۇشەيتىلىپ، 20-دان استام ادامدى پوليتسيا اكەتكەن. تارازدا دا ورتالىق كوشەلەردە ارنايى جاساق جۇمىلدىرىلدى. اقتوبە مەن استانادا پوليتسيا كەم دەگەندە ون ادامدى اكەتتى. ميتينگ جوسپارلانعان ايماقتاردا عالامتور جۇمىسى ناشارلاعان. ازىرگە ءىىم ۇستالعاندار تۋرالى مالىمدەمە جاساعان جوق.

ءابليازوۆتىڭ جۇرتشىلىقتى ميتينگىگە ۇندەۋىمەن قاتار جارىسا پروفيلاكتيكاعا قامداناتىن ءىىم قوعامدا «باسقاشا ويلايتىن» بەلسەندىلەردى ءارتۇرلى ايىپتارمەن ۇيدە نەمەسە يزولياتوردا قاماۋدا ۇستاۋدى ادەتكە اينالدىرعان.

                                   

*فوتوماتەريالدى كوشىرىپ جاريالاۋعا، باسۋعا، تاراتۋعا رۇقسات بەرىلمەيدى. 

"The Qazaq Times"