بۇگىن «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپ وكىلدەرى الماتىدا جيىن وتكىزدى. توپتىڭ ءار ايماقتاعى مۇشەلەرى بيلىك تاراپىنان قىسىمعا ۇشىراپ جاتقانىن ايتقان دەمپارتيا جەتەكشىسى جانبولات ماماي 22 اقپانعا جوسپارلانعان قۇرىلتاي سەزدىڭ وتپەيتىنىن، ونىڭ ورنىنا توپ بەلسەندىلەرى ميتينگىگە شىعاتىنىن حابارلادى.

جاپپاي قۋعىن-سۇرگىن بولىپ جاتقان تۇستا قانداي دا ءبىر سەزد وتكىزۋدىڭ قيسىنسىز ەكەنىن ايتقان جانبولات ماماي: «دەموكراتيالىق پارتيانىڭ» جاقتاستارى، مۇشەلەرى مىنا باستاماشىل توپ وكىلدەرىنە جاسالىپ جاتقان قىسىمعا قارسى جانە ساياسي تۇتقىنداردى بوساتۋدى تالاپ ەتىپ، قازاقستانعا شىنايى ساياسي رەفورمالاردىڭ جۇرگىزىلۋىن تالاپ ەتەمىز. كۇنى كەشە عانا بولعان قوردايداعى جانجالدىڭ ءادىل تەكسەرىلۋىن تالاپ ەتىپ، 22 اقپاندا «ەسكى الاڭعا» ميتينگىگە شىعۋعا شەشىم قابىلدادىق. ءبىز «دەموكراتيالىق پارتيانىڭ» سەزىن وتكىزبەيمىز»، — دەدى.

وتكەن اپتادا جانبولات مامايدىڭ ءار ايماقتان باستاماشىل توپقا كىرگەن ازاماتتار حابارلاسىپ، جەرگىلىكتى بيلىك پەن پوليتسيانىڭ ۇيلەرىنە بارىپ، وزدەرىن «تەرگەگەنىن» ايتىپ شاعىمداندى دەگەن بولاتىن. قۇرىلتايعا جول تارتقان ورال، قوستاناي، تارازداعى توپ مۇشەلەرىن پوليتسيا توقتاتىپ، تەرگەۋگە العان. الماتى قالاسى الاتاۋ اۋدانى اقبۇلاق شاعىن اۋدانىندا تۇراتىنىن ايتقان ابزال دوستياروۆ 15 قاڭتاردا ءوزى ۇيدە جوقتا اكىمدىكتىڭ ىشكى ساياسات بولىمىنەن ەكى قىزمەتكەر كەلىپ، «ءوزىنىڭ باستاماشىل توپتاعى ارەكەتى» جايلى سۇراپ كەتكەن.

ايتا كەتەيىك، قازاقستاندا پارتيا قۇرۋ ءۇشىن الدىمەن مىڭ ادام قاتىساتىن سەزد وتكىزۋ مىندەتتى. 2019 جىلى 26 جەلتوقساندا نۇر-سۇلتاندا 1122 ادامنان تۇراتىن «قازاقستاننىڭ دەموكراتيالىق پارتياسىنىڭ» باستاماشىل توبىن تىركەگەن. كەيىننەن دەمپارتيا جەتەكشىسى جانبولات ماماي 22 اقپاندا سەزد وتەتىنىن حابارلاعان.

قازىرگى كەزدە قازاقستاندا رەسمي تىركەلگەن التى پارتيا بار. پارلامەنتتە ءۇش پارتيانىڭ وكىلدەرى وتىر: بۇرىنعى پرەزيدەنت نۇرسۇلتان نازارباەۆ باسقاراتىن «نۇر وتان» پارتياسى، بيلىكشىل «اق جول» جانە «كوممۋنيستىك حالىقتىق پارتياسى».

"The Qazaq Times"