قىتاي سىرتقى ىستەر مينيسترلىگى سەيسەنبى كۇنى حابارلاما جاريالاپ، قحر توراعاسى شي جينپيڭ  (سي تسزينپين) فلوريدا شتاتىنا بارىپ،  مار-ا-لاگو (Mara-a-lago) ەليتنىي رايونىندا اقش پرەزيدەنتى دونالد ترامپپەن كەزدەسۋگە دايىندالىپ جاتقانىن ايتتى.  ترامپ جاڭا ۇكىمەتى مەن قىتاي اراسىنداعى العاشقى رەسمي كەڭەيتىلگەن وتىرىس وسى اتالعان جەردە بولماق.

بىرنەشە اپتادان بەرى بۇل كەزدەسۋ جوسپارلاۋ ساتىسىندا بولعان، كومەكشىلەر ناقتى ماسەلەلەر جونىندە ورنالاستىرۋلار جاساپ كەلدى. اق ءۇي وكىلدەرىنىڭ ءبىرىنىڭ ايتۋىنا قاراعاندا قىتاي تارابى كەزدەسۋدى ترامپتىڭ كۋرورتىندا وتكىزۋدى قايتا-قايتا تالاپ ەتكەن. الايدا، اق ءۇي جاق ونداي ورتا كەزدەسۋدە تالقىلاناتىن كەيبىر وتكىر ماسەلەلەردىڭ ءزىلىن جۇمسارتادى دەپ قابىلداماعان. ەكى ەل باسشىسىنىڭ رەسمي كۇن ءتارتىبى بەلگىلى بولدى – ولار ەكى ەل قارىم-قاتىناسىنداعى ەڭ وزەكتى دەگەن ماسەلەلەردى ورتاعا سالادى; ترامپ قىتايدىڭ ادىلەتسىز ساۋدا كەلىسىمدەرى تۋرالى ماسەلەردى العا تارتادى; سولتۇستىك كورەيانىڭ يادرولىق قارۋدى دامىتۋى مەن ارانداتۋ ىستەرى دە ايتىلادى; سونىمەن قاتار امەريكالىقتاردى الاڭداتىپ وتىرعان قىتاي تەڭىز ارمياسىنىڭ وڭتۇستىك قىتاي تەڭىزىندەگى ارەكەتتەرىنىڭ جيىلەۋى دە ءسوز بولماق.

كەزدەسۋ كەلەسى ءساۋىر ايىنىڭ 6-7-ءشى كۇندەرى بولادى دەپ كۇتىلۋدە. اقش مەملەكەتتىك حاتشىسى رەكس ۋ. تيللەرسون جاقىندا قىتايدا بولىپ قايتقان ەدى. ول جانە قىتاي استاناسىندا قحر توراعاسىمەن كەزدەسىپ، كەلەسى كەزدەسۋ تۋرالى ناقتىلاپ كەتكەن بولاتىن. قىتاي سىرتقى ىستەر مينيسترلىگىنىڭ ءباسپاسوز مالىمدەمەشىسى: "قىتاي باسشىسى فينليانديا ساپارىنان كەيىن بىردەن اقش فلوريداسىنا جول الادى", – دەدى.

9 اقپان كۇنى ەكى ەل باسشىسى امەريكاداعى پرەزيدەنت الماسۋىنان كەيىن العاش رەت تەلەفوندا سويلەسكەن بولاتىن. بۇل سويلەسۋدە ولار «ۇلكەن قىتاي» ساياساتىنىڭ مويىندالاتىنى، بەيجىڭنىڭ بىردەن ءبىر ديپلوماتيالىق ارىپتەس ەكەنىن، تايۋان (تايۆان) جاقتى دەربەس قابىلدامايتىنى تۋرالى كەلىسكەن ەدى. الايدا، پرەزيدەنتتىك تاققا وتىرۋدان بۇرىن ترامپ: «ۇلكەن قىتاي» ساياساتىن قايتالاي تالقىلاۋ كەرەك»، – دەپ قىتايلىق بيلىكتى ورنىنان ورە تۇرعىزعان بولاتىن.

“The Qazaq Times”