اقش مەملەكەتتىك حاتشىسى مايك پومپەو رەسمي ىسساپارمەن كيەۆكە باردى. 

ءىسساپار بارىسىندا پومپەو ۋكراينا پرەزيدەنتى ۆلاديمير زەلەنسكيمەن كەزدەسىپ، قىرىم اننەكسياسى، دونباسس جاعدايىن تالقىلايدى. Handelsblatt نەمىس باسىلىمىنىڭ حابارلاۋىنشا، تاراپتار پرەزيدەنت ترامپتىڭ يمپيچمەنتى ماسەلەسىنە «سەبەپكەر» بولعان جاعدايدى دا ءسوز ەتۋى مۇمكىن. سەبەبى بۇل ماسەلە اقش پەن ۋكرايناعا تىكەلەي بايلانىستى.

پومپەو ۋكرايناعا قارجىلىق جانە اسكەري كومەك بەرۋدى دە تالقىلايدى. اقش قورعانىس مينيسترلىگىنىڭ مالىمەتتەرىنە سايكەس، ۋاشينگتوننان كيەۆكە 2014 جىلدان باستاپ كورسەتىلگەن اسكەري كومەك كولەمى $1,5 ملرد-قا جەتكەن. 20 قىركۇيەكتە اقش كونگرەسس وكىلدەرىنىڭ پالاتاسى ۋكرايناعا اسكەري كومەككە $ 250 ملن ءبولۋدى ماقۇلدادى. ءتيىستى تارماق فەدەرالدىق ۇكىمەتتى ۋاقىتشا قارجىلاندىرۋ تۋرالى كونگرەسسمەندەر بەكىتكەن زاڭ جوباسىندا جازىلعان.

بىلتىر تامىزدا ۋاشينگتون كيەۆكە اسكەري كومەك بەرۋ شەشىمىن قايتا قاراماق بولعان. قارجى قۇرىلىمىنا تەكسەرىس جۇرگىزۋشىلەردىڭ اراسىندا اقش قورعانىس ءمينيسترى مارك ەسپەر مەن اقش پرەزيدەنتىنىڭ ۇلتتىق قاۋىپسىزدىك جونىندەگى كومەكشىسى دجون بولتون بولدى.

ايتا كەتەيىك، مايك پومپەو پوستكەڭەستىك ەلدەرگە قاڭتاردىڭ باسىندا كەلۋى ءتيىس ەدى. بىراق اقش-يران قاقتىعىسىنا بايلانىستى پومپەونىڭ ۋكراينا، بەلارۋس، قازاقستان، وزبەكستان جانە كيپرعا جوسپارلاعان ساپارىن كەيىنگە قالدىرىلعان.

"The Qazaq Times"