رەسەي كەزەكتى مارتە باتىس ەلدەرىنىڭ سانكتسياسىنا ىلىكتى

ەۋروپالىق وداق، اقش جانە كانادا «اگرەسسيالىق ساياسات ۇستانىپ، قىرىمدى جاۋلاۋعا تىرىسقانى ءۇشىن» رەسەيگە قارسى ەكونوميكالىق سانكتسيا ەنگىزدى.

مالىمەتتەر بويىنشا، رەسەيدىڭ قولداۋىنا يە بولىپ، قىرىمدا زاڭسىز ارەكەت ەتىپ وتىرعان سەگىز ادامعا سانكتسيا ەنگىزىلدى. سونىمەن قاتار، اقش-تاعى جەكە تەمىر جول كومپانياسىنىڭ اكتيۆتەرى بۇعاتتالادى. ەۋرووداق جەتى ادامدى، ال كانادا التى ادامدى «قارا تىزىمگە» ەنگىزگەن.

رەسەي 2014 جىلى ناۋرىزدا قىرىمدى اننەكسيالاعان. ماسكەۋدىڭ بۇل ارەكەتىنە ۋكراينا، اقش جانە ەۋروپالىق وداق قۇرامىنداعى مەملەكەتتەر قارسىلىق ءبىلدىرىپ، رەسەيدى «اگرەسسيالىق ساياسات ۇستاناتىن مەملەكەت» دەپ اتاعان. ءالى كۇنگە دەيىن اقش، ەو، تۇركيا، ۋكراينا قىرىمدى رەسەي جەرى رەتىندە مويىندامايدى.

2018 جىلى 25 قاراشادا رەسەي ارنايى جاساعى ازوۆ تەڭىزىندە ۋكراينا اسكەري تەڭىز كۇشتەرىنە تيەسىلى ءۇش بىردەي كەمەگە شابۋىل جاساپ، باسىپ العان بولاتىن. وسىدان كەيىن ۋكراينا قاۋىپسىزدىك كەڭەسىنىڭ كەزەكتەن تىس وتىرىسى ءوتىپ، ەل پرەزيدەنتى پەتر پوروشەنكو سوعىس جاعدايىن ەنگىزگەن. ەكى ەل اراسىنداعى تەكەتىرەس ناتو مەن ەو ەلدەرىن جانە اقش-تى بەي-جاي قالدىرعان جوق. ناتو رەسەيدەن ۋكراينانىڭ اۋماقتىق تۇتاستىعىنا قۇرمەتپەن قاراۋدى تالاپ ەتسە، ۋاشينگتون ماسكەۋدى «اگرەسسيالىق مەملەكەت» دەپ ايىپتادى.

گەرمانيا ءسىم 2014 جىلعى قىرىم اننەكسياسى مەن كەرشتەگى جاعدايدى ەسكەرە وتىرىپ، رەسەيگە قارسى سانكتسيانى كۇشەيتەتىنىن ايتقان. سونداي-اق ەۋروپالىق وداق قۇرامىنداعى مەملەكەتتەر جانە ناتو تولىعىمەن ۋكرايناعا قولداۋ ءبىلدىردى.

"The Qazaq Times"