ءىى ەليزاۆەتا پاتشايىمنان كەيىن ەۋروپارلامەنتتىڭ كونستيتۋتسيالىق ىستەر جونىندەگى كوميتەتى دە ۇلىبريتانيانىڭ ەۋرووداقتان شىعۋ تۋرالى كەلىسىمشارتتى بەكىتتى. 

Telegraph سايتىنىڭ حابارلاۋىنشا، قۇرىلىمنىڭ 23 مۇشەسى قۇجاتتى قولداپ داۋىس بەرسە، ۇشەۋى قارسى شاقتى. كەلىسىمگە ەۋروكەڭەس پەن ەۋروكوميسسيا باسشىسى قول قويۋى ءتيىس. ەۋروپارلامەنت دەپۋتاتتارى بولسا ونى 29 قاڭتاردا داۋىسقا سالادى. وسىدان كەيىن قاڭتاردىڭ 31-ىنەن باستاپ بيىلعى جىلدىڭ سوڭىنا دەيىن وتپەلى كەزەڭ جۇرەدى. وسى ارالىقتا بريۋسسەل مەن لوندون ەكىجاقتى قاتىناستىڭ كەلەشەگىن تالقىلاپ، ايقىنداۋى ءتيىس.

13 جەلتوقساندا ەلدە مەرزىمىنەن بۇرىن پارلامەنتتىك سايلاۋ ءوتىپ، ناتيجەسىندە باسقارۋشى پارتيا جەڭىسكە جەتكەن بولاتىن. كەيىننەن پرەمەر-مينيستر بوريس دجونسون 31 قاڭتارعا بەلگىلەنگەن جوسپار لەيبوريستەر پارتياسىنىڭ قارسىلىعىنا قاراماستان مىندەتتى تۇردە جۇزەگە اسادى دەپ ۋادە بەردى.

وسى اپتادا ەۋروكوميسسيانىڭ (ەك) باسشىسى ۋرسۋلا فون دەر ليايەن مەن ەۋروپا كەڭەسىنىڭ توراعاسى چارلز ميشەل بريۋسسەلدە قاجەتتى قۇجاتتارعا قول قويادى. ال 31 قاڭتاردا بىرنەشە مارتە ءساتسىز فينيشپەن ۇزاققا سوزىلعان Brexit كەلىسىمىنە نۇكتە قويىلىپ، بىرىككەن كورولدىك ەۋروپالىق وداق قۇرامىنان شىعادى.

"The Qazaq Times"