رەسەيدىڭ جاڭا پرەمەر-ءمينيسترى ميحايل ميشۋستين. فوتو: ريا

رەسەيدىڭ ۇكىمەت باسىنا كەلگەن ميحايل ءميشۋستيننىڭ ميللياردەر قارىنداسى باق نازارىنا ىلىكتى. مالىمەتتەرگە قاراعاندا جاڭا پرەمەردىڭ قارىنداسى ناتاليا ستەنينانىڭ ماسكەۋدە قۇنى 1 ملرد اقش دوللارىنا تەڭ جىلجىمايتىن مۇلكى بار. الايدا، ونىڭ جۇرتقا بەلگىلى جالعىز عانا بيزنەسى بار، ەڭ قىزىعى ونىڭ بۇل رەستورانى ءوزىن اقتاماي جابىلىپ قالعان.

رەسەي جانە شەتەلدىك اقپارات كوزدەرى ناتاليا ستەنينانىڭ يەلىگىندەگى جىلجىمايتىن مۇلىكتەردىڭ اشىق دەرەكتەردە كورسەتىلمەيتىنىن جازادى. ول يەلىك ەتكەن قۇندى جىلجىمايتىن مۇلىكتەردىڭ كوبى مەملەكەت يەلىگىندە دەپ كورسەتىلگەن. سوڭعى كەزدەرى رەسەيلىك شەنەۋنىكتەردىڭ يەلىگىندەگى جىلجىمايتىن مۇلىكتەر «رەسەي فەدەراتسياسىنىڭ يەلىگىندە» دەپ كورسەتىلە باستاعان. بۇل ارينە سىرت كوزگە سولاي بولعانىمەن قازىرگى پرەمەر ميشۋستين باسقارىپ كەلگەن فەدەرالدىق سالىق قىزمەتىندە ونىڭ ناقتى يەلەرى بەلگىلى. بىراق، بۇنداي مالىمەتتەر كوپشىلىككە قول جەتىمدى ەمەس.

جاڭا پرەمەردىڭ ميللياردەر قارىنداسى. فوتو: BBC

ناتاليا ستەنينا ماسكەۋدەگى Knightsbridge Private Park كومپلەكسىنە يەلىك ەتەدى. ونداعى پاتەرلەردىڭ ءار شارشى مەترى قازىرگى نارىقتا 1 ملن رۋبل دەپ باعالانعان. بىراق، بۇل كومپلەكس ستەنيناعا تيەسىلى باعالى جىلجىمايتىن مۇلىكتەردىڭ ءبىرى عانا.

ماسكەۋدەگى Knightsbridge Private Park كومپلەكسى. فوتو: BBC

رەسەي لاۋازىمدىلارىنىڭ دۇنيە-مۇلكى تۋرالى زەرتتەپ كورگەن BBC جۋرناليستەرى جوعارىداعىداي ادىستەرمەن مۇلىك يەلەنۋ سول ەلدەگى جوعارى لاۋازىمدىلار اراسىندا قالىپتى قۇبىلىس سانالاتىنىن ايتادى.

“The Qazaq Times”