جازۋشى شىڭعىس ايتماتوۆ. فوتو: centralasian.org

بريتاندىق The Independent باسىلىمى ءالەمنىڭ ءابەدي كارتاسىن شىعاردى. وندا قىرعىزستاننان ءالەم ءادەبيەتىنىڭ كلاسسيگى شىڭعىس ايتماتوۆتىڭ "جءاميلا" پوۆەسى ۇسىنىلعان. 

سentralasian.org مالىمەتىنە سۇيەنسەك، كارتادا قازاقستاندى ايتماتوۆتىڭ تاعى ءبىر شىعارماسى - "عاسىردان دا ۇزاق كۇن" ("The Day Lasts More Than a Hundred Years") رومانى تانىستىرادى.

باسىلىم وسى شىعارمالار ارقىلى باسقا دا مادەنيەتتەردى جاقىنىراق بىلۋگە بولاتىنىن جازدى.

وزبەكستاندى - توم بيسسەلدىڭ "تەڭىزگە شىعار جول" شىعارماسى، تاجىكستاندى - اندرەي ۆولوستىڭ "حۋرراماباد" رومانى، ال تۇركىمەنستاندى - اك ۆەلساپاردىڭ "ايپي تۋرالى اڭىز" شىعارماسى ارقىلى تانۋعا بولادى. رەسەي اتىنان لەۆ تولستويدىڭ "بەيبىتشىلىك جانە سوعىس" رومانى ۇسىنىلعان. كارتاعا الەمنىڭ 197 ەلى ەنگەن.

قاراپ وتىرساڭىز، ءبىر ەلدى تانىتاتىن شىعارمالاردى سول ەلدىڭ ءتول جازۋشىسى جازۋ مىندەت ەمەس ەكەن. كەرىسىنشە، سول ەل تۋرالى جازعان باسقا ۇلت جازۋشىسىنىڭ تانىمال شىعارماسى، قالامگەردىڭ الەمدىك دەڭگەيدە اتى بار تۇلعالىعى قاجەت ەكەن. وسى ادەبي كارتادا قازاق جازۋشىسىنىڭ اتى، شىعارماسى نەگە جوق؟ الدە قازاقستاندى تانىتا الاتىن قازاق قالامگەرى مەن شىعارماسى جوق پا؟ ماسەلە، سونى الەمگە ناسيحاتتايىن، تانىتاتىن ىقىلاس جوق، نيەت جوق. ايتپەسە، ادەبي كارتادا تۇرۋعا لايىق شىعارما دا، قالامگەر دە قازاقتا بار.

ءبىزدىڭ ادەبيەت نەگە الەمدىك دەڭگەيدە اۋىزعا ىلىنبەيدى دەگەندە، ونىڭ دەڭگەيىنىڭ تومەندىگىنەن ەمەس، ونى اۋدارىپ، بيىك دەڭگەيدە تانىتاتىن مەملەكەتتىك قولداۋ كەرەك ەكەنىن تۇسىنەسىڭ. مەملەكەت تاراپىنان دەمەۋ، ءتىپتى ۇلكەن قامقورلىق بولماسا، ءوز قازانىندا عانا قايناپ جاتقانا قازاق ادەبيەتى ەشكىمگە تانىلماعان كۇيى قالا بەرمەك. ال، ونىڭ ورنىن باسقا ەل جازۋشىلارى يەلەنىپ كەتەرى انىق.

“The Qazaq Times”