بىلتىرعى جەتىستىگىن جىپكە تىزگەن ۇكىمەت باسشىسى ۋادەنى ءۇيىپ-توكتى

بۇگىن ساعات 10:30-دا مەملەكەت باسشىسى قاسىم-جومارت توقاەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى باستالدى. «وتكەندى سارالاپ، الداعىنى جوسپارلاۋ» جيىنىندا پرەزيدەنت توقاەۆ «ەكونوميكالىق ءوسىم 4,5%-عا جەتتى» دەپ سۇيىنشىلەدى.  

ءسوز العان ۇكىمەت باسشىسى اسقار مامين ەلىمىزدىڭ 2019 جىلعى الەۋمەتتىك-ەكونوميكالىق دامۋ قورىتىندىسى جانە بيىلعى جوسپار جونىندە بايانداپ باقتى. ول «وڭدەۋ ونەركاسىبى 4,4%-عا، تاۋ-كەن ونەركاسىبى 3,7%-عا، مەتالل كەنىن ءوندىرۋ كولەمى 16%-عا، نەگىزگى كاپيتالعا ينۆەستيتسيا 8,5%-عا، جەكە ينۆەستيتسيا 9,5%-عا، حالىقتىڭ ناقتى تابىسى 5,5%-عا، 2,7 ملن ادامنىڭ جالاقىسى ءوستى» دەپ اعىنان جارىلدى.

اسقار ءماميننىڭ ايتۋىنشا، ازىرگە قاعازداعى سان-ەسەپ بويىنشا بيىل قازاقستاندا 15 ملن شارشى مەتر تۇرعىن ءۇي سالىنىپ، 150 مىڭ وتباسى جاڭا باسپاناعا يە بولاتىن كورىنەدى. سونداي-اق 430 مىڭ جاڭا جۇمىس ورنى اشىلاتىنى حابارلاندى.

– مۇندا جاڭا جۇمىس ورىندارى نەگىزىنەن تۋريزم، ساۋدا مەن قۇرىلىس سالالارىندا، سونداي-اق، وڭدەۋ ونەركاسىبى مەن اوك سالاسىندا دا جاڭا جۇمىس ورىندارى اشىلادى، – دەدى پەرمەر-مينيستر.

اسقار ءماميننىڭ سوزىنشە:

• الداعى 7 جىلدا 3,5 مىڭ اۋىلداعى ينفراقۇرىلىمدى دامىتۋعا 900 ملرد تەڭگە جۇمسالماق;
• «اۋىل – ەل بەسىگى» جوباسى اياسىندا 800 جوبا جۇزەگە اسىرىلادى;
• 2026 جىلعا قاراي 1,2 ترلن تەڭگەلىك جەكە ينۆەستيتسيا تارتۋ ارقىلى زامانعا ساي ءىرى 19 جاڭا مەديتسينالىق ورتالىق اشىلادى;
• 2020 جىلى 200 جاڭا مەكتەپ اشىلادى. ونىڭ 100 – جەكە مەكتەپ;
• بيىل 44 ستۋدەنتتىك جاتاقحانا پايدالانۋعا بەرىلەدى;
• بيىل 90 ملن توننا مۇناي مەن 56,3 ملرد كۋب گاز وندىرىلمەك;
• ۇكىمەت ەكونوميكا ءوسىمىن 4,7-5 % دەڭگەيگە جەتكىزبەك;
• 430 مىڭ جاڭا جۇمىس ورنىن قۇرىلماق;
• شيكىزاتتىق ەمەس ەكسپورتتى $18,6 ملرد دەيىن جەتكىزۋ;
• حالىقتىڭ ناقتى تابىسىن 6%-عا ارتتىرۋ،
• ميكرو-ورتا بيزنەستىڭ ەكونوميكاداعى ۇلەسىن 30%-عا دەيىن ۇلعايتۋ;
• 15 ملن شارشى مەتر تۇرعىن ءۇي سالۋ;
• اۋىل شارۋشالىعى ونىمدەرىن سىرتتان اكەلۋدى 6%-عا ازايتپاق;
• اگروونەركاسىپ سالاسىندا 40 مىڭ جاڭا جۇمىس ورنى اشىلادى.

"The Qazaq Times"