ميانماداعى مۇسىلماندارعا باعىتتالعان قىرعىنشىلىققا قاتىستى بۇۇ-نىڭ گااگاداعى سوتى سوڭعى شەشىمىن جاريا ەتپەك. ميانما ۇكىمەتى 600 مىڭنان استام روحيندجا مۇسىلماندارىنا قارسى گەنوتسيد جاسادى دەپ ايىپتالعانى بەلگىلى. ەگەر بۇل ايىپتاۋ تۇراقتاندىرىلسا، بۇۇ تارابىنان روحيندجالاردى قورعاۋعا الۋى مۇمكىن.

ماسەلەنىڭ حالىقارالىق سوتتا قارالۋى جانە گەنوتسيد ايىبىنىڭ تاعىلۋى ميانما ليدەرى جانە نوبەلدىڭ بەيبىتشىلىك جونىندەگى سىيلىعىنىڭ يەگەرى اۋن سان سۋ چجيدىڭ بەدەلىنە ۇلكەن نۇقسان كەلتىرگەنى انىق. ول گااگاداعى سوتتا ميانما ۇكىمەتىنىڭ پوزيتسياسىن ءوزى قورعاپ جاتىر.

ەستەرىڭىزدە بولسا، 2016 جىلدىڭ قازان ايى جانە 2017 جىلدىڭ جەلتوقسانىندا ميانما قارۋلى كۇشتەرى روحيندجالار قونىستانعان راكحاين ايماعىنا اسكەري وپەراتسيا جۇرگىزگەن بولاتىن. ميانما بيلىگى بۇل اسكەري وپەراتسيانىڭ بەنگالدىق لاڭكەستەرگە باعىتتالعانىن ايتادى. بىراق، سونىڭ ناتيجەسىندە 900 مىڭعا جۋىق روحيندجا كورشىلەس بانگلادەشكە قاشىپ وتكەن ەدى.

وسى وقيعاعا بايلانىستى «شەكاراسى دارىگەرلەر ۇيىمى» جاساعان مالىمدەمەدە، 6700 روحيندجا قازا تاپقانى، ونىڭ 700-دەن استامى بالالار ەكەنى ايتىلعان ەدى. 2018 جىلى بۇۇ ادام قۇقىقتارى جونىندەگى كوميتەتى روحيندجالارعا قارسى ماسسالىق قىرعىن جانە گەنوتسيد بەلگىلەرى بولعان دەپ ايىپتادى. بىراق، ميانما بيلىگى بۇل ايىپتى جوققا شىعاردى جانە قارۋلى ارەكەتتى قاراقشىلارعا قارسى جاساعانىن ايتتى.

“The Qazaq Times”