جاپون بالالارىنىڭ مەكتەپتەن باس تارتۋى ەل عالىمدارىن الاڭداتۋدا

جاپون جاسوسپىرىمدەرى اراسىندا مەكتەپتەن باس تارتقاندار سانى بارعان سايىن كوبەيىپ كەلەدى. جاپوندار بۇل ءۇردىستى «فۋتوكو» دەپ اتاپ، ونىڭ سەبەبىن تابۋعا تىرىسۋدا. ولار بۇعان كىنالى مەكتەپ پە، وقۋشى ما الدە اتا-انامەن دەگەن ساۋالعا جاۋاپ ىزدەسۋدە.

جاپونيا ءبىلىم مينيسترلىگىنىڭ مالىمەتىندە، مەكتەپ وقۋشىلارىنىڭ مەكتەپتەن قاشۋ ارەكەتتەرىنىڭ ءۇش ءتۇرلى سەبەبى بار دەپ كورسەتكەن: وتباسى جاعدايى; مەكتەپتەگى زورلىق-زومبىلىق ارەكەتتەر; وقۋشىلار اراسىنداعى قاقپايلاۋ نەمەسە مۇعالىمدەرمەن مامىلەسىنىڭ جاراسپاۋى.

بۇل ءۇردىستى زەرتتەپ جۇرگەن الەۋمەت تانۋشىلار جاپون مەكتەپتەرىنىڭ بالالارعا اۋىر تالاپتار قويۋى دا ماسەلەنىڭ باستى سەبەپتەرىنىڭ ءبىرى دەپ كورسەتەدى. كەيبىر وقۋشىلار ءوزىنىڭ جاپون مەكتەپتەرىنىڭ قاتال بۇيرىعىن ورىنداۋدان قاجىعانىن ايتادى. شىنىندا دا، جاپون مەكتەپتەرىندە بالالارعا قاتاڭ تالاپ قويادى. ءتىپتى، بالالاردىڭ كيىم كيىسى مەن شاش ۇلگىسىنىڭ بىردەيلىگىنە دە قاتتى ءمان بەرەدى. بۇل ءۇشىن كەيبىر تابيعي قوڭىرقاي شاشتى بالالارعا شاشىن ۇنەمى قارا تۇسكە بوياتىپ تۇرۋىنا تۋرا كەلەدى.

جاپونيا مەكتەپتەرىندەگى قاتاڭ ءتارتىپ سۋىق كۇندەردە دە بالالارعا مەكتەپ ىشىندە كۇرمە نەمەسە مەكتەپ كيىمىنەن باسقا قالىڭ كيىمدەر كيۋگە شەكتەۋ قويادى. بۇنداي قاتاڭ تالاپتار وتكەن عاسىردىڭ 70-80 جىلدارى ەلدىڭ ءبىلىم ساپاسىن ارتتىرۋ ناۋقاندارىمەن بىرگە پايدا بولعان. بىراق، وتكەن عاسىردىڭ سوڭىنا قاراي ءتىپتى دە قاتاڭ بولا تۇسكەن.

“The Qazaq Times”