جاپونيا رەسەيمەن بەيبىت كەلىسىمگە كەلە الا ما؟ پارلامەنت سەسسياسىندا ەل پرەمەر-ءمينيسترى سيندزو ابە جاپونيا ۇكىمەتى رەسەيمەن ءبىراز ۋاقىتقا سوزىلعان داۋلى ماسەلەنى شەشىپ، كۋريل ارالدارىن زاڭدى تۇردە قايتارۋعا كۇش سالاتىنىن ايتتى. 

ابە سوزىندە: «1956 جىلى قول قويىلعان ورتاق دەكلاراتسيا بويىنشا ارەكەت ەتىپ، ارال ماسەلەسىن رەتتەيمىز. وسى ماقساتتا جاپونيا وگىزدى دە ولتىرمەي، اربانى دا سىندىرماي كەلەدى. جاقىن ارادا رەسەي پرەزيدەنتى ۆلاديمير پۋتينمەن كەلىسىمگە كەلىپ، ىنتىماقتاستىق شارتىنا قول قويامىز دەگەن وي بار»، – دەدى.

جاپونيا پرەمەر-ءمينيسترى سيندزو ابە مەن رەسەي پرەزيدەنتى ۆلاديمير پۋتين وسى ماسەلەنى رەتتەۋ ءۇشىن 2012 جىلدان بەرى بىرنەشە مارتە كەزدەسۋ وتكىزگەن. بىراق كەزدەسۋلەردىڭ ەشقايسىسى وڭ ناتيجە بەرگەن جوق.

نەگىزىنەن ەكى ەل اراسىنداعى «ارال داۋىنىڭ» حرونولوگياسى ەرتەدەن باستالادى. «ۇلكەن جەتىلىك» ەلدەرىنىڭ ىشىندە قىرىم اننەكسياسىنان كەيىن پۋتينمەن كەزدەسۋ ۇيىمداستىرعان ەكىنشى مەملەكەت بولسا دا، جاپونيا مەن رەسەي اراسىنداعى ىنتىماقتاستىق كەلىسىمگە 70 جىلدان بەرى قول قويىلماي كەلەدى.

1855 جىلى 7 اقپاندا تاراپتار يتۋرۋپ جانە ۋرۋپ ارالدارىنىڭ شەكاراسىن انىقتاۋ ءۇشىن ءبىرىنىشى جاپون-ورىس كەلىسىمشارتىنا (سيمود تراكتاتى) قول قويعان. سول ۋاقىتتان بەرى يتۋرۋپ، كۋناشير، شيكوتان جانە كابوماي ارالدارى جاپونياعا تيەسىلى.

1956 جىلى قابىلدانعان بەيبىتشىلىك كەلىسىمشارتىنا سايكەس كسرو كۋناشير مەن يتۋرۋپ ارالدارىن جاپونياعا قايتارۋى ءتيىس ەدى. الايدا ەكىنشى دۇنيەجۇزىلىك سوعىس قورىتىندىسى بويىنشا كسرو بۇكىل كۋريل ارحيپەلاگىن ءوز قۇرامىنا قوستى.

"The Qazaq Times"