يرانداعى ۇكىمەتكە قارسى ەرەۋىل جالعاسۋدا. فوتو: VOA.

يران قارۋلى كۇشتەرىنىڭ ارەكەتتەرىنە قاراسى نارازىلىق شەرۋ جەكسەنبى كۇنى دە جالعاستى. بۇل ۇكىمەتكە قارسى ءوتىپ جاتقان نارازىلىق شەرۋدىڭ ەكىنشى كۇنى. شەرۋ يران تەرريتورياسىندا قۇلاعان ۋكراينا ۇشاعىنا بايلانىستى نارازىلىق بىلدىرۋدەن باستالعان. العاشىندا، يران اسكەريلەرى ۋكراينا ۇشاعىنا قاتىستى وزدەرىنە تاعىلعان ايىپتى جوققا شىعارعان، كەيىن 176 جولاۋشى وتىرعان ۇشاقتى كەزدەيسوق اتىپ تۇسىرگەندەرىن مويىنداعان بولاتىن. 

الەۋمەتتىك جەلىلەر ارقىلى تاراعان مالىمەتتەرگە قاراعاندا نارازىلىق شارالارى ەلدىڭ بىرنەشە قالاسىندا بولىپ جاتىر. ەلدىڭ ورتالىق قالاسىنداعى نارازىلىق شاراسىنا جوعارى وقۋ ورىندارى بەلسەندى قاتىسقانى تۋرالى مالىمەتتەر بار. تەھران ۋنيۆەرسيتەتىنىڭ سىرتىندا ەرەۋىلشىلەر "ولار ءبىزدىڭ جاۋىمىز امەريكا قۇراما شتاتتارى دەپ الدايدى، ءبىزدىڭ جاۋىمىز وسى جەردە!" دەگەن ۇراندار كوتەرگەن.

نارازى جۇرت اۋەلى الەۋمەتتىك جەلىلەردە وزدەرىنىڭ اشۋ-ىزاعا تولى قارسىلىقتارىن بىلدىرگەن. كەيىن يران ۇكىمەتىن تاڭقالدىرارلىق دەڭگەيدەگى قارسىلىق ەرەۋىلىنە ۇلاستى. ءتىپتى، ەرەۋىلشىلەر ەلدىڭ رۋحاني كوسەمىنىڭ بيلىكتەن كەتۋىن تالاپ ەتتى. نارازى جۇرت اراسىندا اقش-تىڭ زىمىران شابۋىلىنان قازا تاپقان يراندىق گەنەرال سۋلەيمانيدىڭ سۋرەتىن جىرتىپ، "سۋلەيماني – قاندىقول، ال ونىڭ جەتەكشىسى – ساتقىن", – دەپ ايعايلاعان. كەيبىر شەتەلدىك باسىلىمدار "وسىدان-اق، قانشاما يراندىقتىڭ بيلىككە نارازى ەكەنىن كورۋگە بولادى" دەگەن پىكىرلەردى جازىپ جاتتى.

ورتالىق قالا پوليتسيا جاساقتارى نارازى توپتىڭ ماڭىنا جينالعان، ولار ارنايى كولىكتەرمەن، سويىلدارمەن، پەينتبول مىلتىقتارىمەن قارۋلانعان. بىراق، نارازى توپتى كۇشپەن تاراتۋ تۋرالى حابارلامالار بولعان جوق.

نارازىلىق شەرۋلەرى تەھراننان تىس شيراز، يسفاحان، حامەدان جانە ورۋميە قاتارلى قالالاردا ءوتتى. امەريكالىق باسىلىمدار بۇل نارازىلىق شارالارىن سۋلەيمانيدىڭ ولىمىنە دەگەن الەمدەگى نارازى كوڭىل كۇيدى سەيىلتتى دەپ باعالاپ وتىر.

“The Qazaq Times”