Irandağı ükimetke qarsı ereuil jalğasuda. Foto: VOA.

Iran qarulı küşteriniñ äreketterine qarası narazılıq şeru jeksenbi küni de jalğastı. Bwl ükimetke qarsı ötip jatqan narazılıq şerudiñ ekinşi küni. Şeru Iran territoriyasında qwlağan Ukraina wşağına baylanıstı narazılıq bildiruden bastalğan. Alğaşında, Iran äskerileri Ukraina wşağına qatıstı özderine tağılğan ayıptı joqqa şığarğan, keyin 176 jolauşı otırğan wşaqtı kezdeysoq atıp tüsirgenderin moyındağan bolatın. 

Äleumettik jeliler arqılı tarağan mälimetterge qarağanda narazılıq şaraları eldiñ birneşe qalasında bolıp jatır. Eldiñ ortalıq qalasındağı narazılıq şarasına joğarı oqu orındarı belsendi qatısqanı turalı mälimetter bar. Tehran universitetiniñ sırtında ereuilşiler "Olar bizdiñ jauımız Amerika Qwrama Ştattarı dep aldaydı, bizdiñ jauımız osı jerde!" degen wrandar kötergen.

Narazı jwrt äueli äleumettik jelilerde özderiniñ aşu-ızağa tolı qarsılıqtarın bildirgen. Keyin Iran ükimetin tañqaldırarlıq deñgeydegi qarsılıq ereuiline wlastı. Tipti, ereuilşiler eldiñ ruhani köseminiñ bilikten ketuin talap etti. Narazı jwrt arasında AQŞ-tıñ zımıran şabuılınan qaza tapqan irandıq general Suleymanidıñ suretin jırtıp, "Suleymani – qandıqol, al onıñ jetekşisi – satqın", – dep ayğaylağan. Keybir şeteldik basılımdar "osıdan-aq, qanşama irandıqtıñ bilikke narazı ekenin köruge boladı" degen pikirlerdi jazıp jattı.

Ortalıq qala policiya jasaqtarı narazı toptıñ mañına jinalğan, olar arnayı köliktermen, soyıldarmen, peyntbol mıltıqtarımen qarulanğan. Biraq, narazı toptı küşpen taratu turalı habarlamalar bolğan joq.

Narazılıq şeruleri Tehrannan tıs Şiraz, Isfahan, Hamedan jäne Orumie qatarlı qalalarda ötti. Amerikalıq basılımdar bwl narazılıq şaraların Suleymanidıñ ölimine degen älemdegi narazı köñil küydi seyiltti dep bağalap otır.

“The Qazaq Times”