جاپونيا مەن قىتاي جاڭا ساياسي كەلىسىمگە قول قويماق

جاپونيا مەن قىتاي «بەسىنشى ساياسي قۇجاتقا» قول قويماق. ەكى ەلدىڭ بولاشاق قارىم-قاتىناسىنىڭ دامۋىنا نەگىز قالايدى دەلىنگەن بۇل قۇجاتقا قىتاي باسشىسى شي جيپيڭنىڭ (XI Jinping/سي تسزينپين) وسى كوكتەمگە جوسپارلانعان جاپونياعا رەسمي ساپارى كەزىندە قول قويىلادى دەپ كۇتىلۋدە. بۇل تۋرالى جاپوننىڭ «كيودو» اقپاراتتىق اگەنتتىگى بەيسەنبى كۇنى (9 قاڭتار) حابارلاعان بولاتىن.

حابارعا قاراعاندا، جاپونيانىڭ ءسىم لاۋازىمدى وكىلدەرى 13 قاڭتاردا بەيجىڭگە ساپارلاي بارىپ، جاپون-قىتاي قاتىناسىن دامىتۋعا ارنالعان اتالمىش قۇجات بويىنشا كونسۋلتاتسيالار باستاۋدى جوسپارلاپ وتىر.

جاپون-قىتاي قاتىناسىنىڭ تاريحىنا نازار اۋدارعاندا، ەكى ەل رەسمي ديپلوماتيالىق بايلانىستى قالپىنا كەلتىرگەننەن بەرى 4 رەت ماڭىزدى ساياسي قۇجاتقا قول قويعانىن كورەمىز. العاشقىسى 1972 جىلعى «جاپون-قىتاي بىرلەسكەن مەموراندۋمى»; ەكىنشىسى 1978 جىلى قول قويىلعان «جاپونيا-قىتاي بەيبىتشىلىك جانە دوستىق تۋرالى كەلىسىم»; ءۇشىنشىسى 1998 جىلى جاساسقان «قىتاي-جاپونيا بىرلەسكەن دەكلاراتسياسى»، سوڭعىسى 2008 جىلى جاساسقان «قىتاي-جاپونيا اراسىنداعى ستراتەگيالىق ءوزارا قاتىناستاردى جان-جاقتى دامىتۋ تۋرالى بىرلەسكەن مالىمدەمەسى».

جاپونيا باس ءۋازىرى (پرەمەر-ءمينيسترى) شينزو ابە (ابە سيندزو) مەن قىتاي باسشىسى شي جينپيڭ بىلتىر جەلتوقساندا جاپونيا-قىتاي-كورەيا باسشىلارىنىڭ ۇشجاقتى سامميتىندە كەزدەسكەن بولاتىن. كەزدەسۋدە قىتاي باسشىسى قوس تاراپتان قىتايدىڭ «ءبىر بەلدەۋ، ءبىر جول» جوباسىنا قولداۋ كورسەتۋىن ءۇمىت ەتكەن ەدى.

Kyodo News حابارىنا قاراعاندا، ەكى ەل اراسىنداعى «بەسىنشى ساياسي قۇجاتتا» الەمدەگى بەيبىتشىلىك پەن تۇراقتىلىق، سونىڭ ىشىندە شىعىس ازيا، جاپونيا مەن قىتايدىڭ مىندەتتەرى تۋرالى ايتىلۋى مۇمكنى دەپ كورسەتەدى. دەگەنمەن، ساراپشىلاردىڭ پىكىرىنە سەنسەك، ەكى ەلدىڭ تالاستى ارالدار مەن تەڭىز ايدىندارىنا قاتىستى ماسەلەدە پىكىر بىرلىگىنە كەلۋى قيىنعا سوقپاق.

“The Qazaq Times”