فوتو: https://qaz.neonomad.kz

قازاقستاندا ءبىر جىلدىڭ وزىندە ەكى مىڭنان استام جەمقورلىق ءىسى قوزعالادى. سونىمەن قاتار شامامەن 1 200-گە تارتا ادام قىلمىستىق جاۋاپقا تارتىلادى

سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ولجاس بەكتەنوۆ: «ءدال قازىرگى ۋاقىتتا سىبايلاس جەمقورلىققا قارسى قىزمەت بۇگىندە 65 قىلمىسكەردى ىزدەستىرىپ جاتىر. سىبايلاس جەمقورلىققا قاتىستى بۇل ادامداردىڭ اراسىندا 33-ءى شەتەلدە جاسىرىنىپ ءجۇر»، – دەدى.

وتكەن جىلدىڭ سوڭىندا پارلامەنت سەناتىنىڭ جالپى وتىرىسىندا «قازاقستان مەن ەۋروپا كەڭەسى اراسىنداعى سىبايلاس جەمقورلىققا قارسى مەملەكەتتەر توبى وكىلدەرىنىڭ جانە باعالاۋشى توپتار مۇشەلەرىنىڭ (گرەكو) ارتىقشىلىقتارى مەن يممۋنيتەتتەرىنە قاتىستى كەلىسىمدى راتيفيكاتسيالاۋ تۋرالى» زاڭى قابىلدانعان بولاتىن. 9 قاڭتاردا قازاقستان ەۋروپا كەڭەسىنىڭ سىبايلاس جەمقورلىققا قارسى مەملەكەتتەر توبى (گرەكو) باستاماسىنا قوسىلدى. بۇل جونىندە مالىمدەمە جاساعان و.بەكتەنوۆ: «ءبىرىنشى كەزەكتە، ەۋروپا كەڭەسى ساراپشىلارى سىبايلاس جەمقورلىققا قارسى زاڭناماعا ۇنەمى مونيتورينگ جۇرگىزىپ ءتۇرادى. بۇل تۇرعىدا الەمدىك ۇزدىك تاجىريبەلەرگە، حالىقارالىق نورماتيۆتىك-قۇقىقتىق اكتىلەرگە سايكەستىك باعىتى نازاردا بولادى. مونيتورينگتىڭ ءاربىر راۋندىنىڭ قورىتىندىسى بويىنشا ەلىمىزگە ءتيىستى ۇسىنىستار جاسالادى، ياعني جەمقورلىققا قارسى ءىس-قيمىل تيىمدىلىگىن ارتتىرۋ ماقساتىندا زاڭناماعا وزگەرىستەر نەمەسە ۇيىمداستىرۋ شارالارىن قابىلداۋ قادامدارى پىسىقتالادى»، – دەدى.

نەگىزىنەن گرەكو-عا قوسىلۋ ەۋروپا كەڭەسىنىڭ سىبايلاس جەمقورلىق ءۇشىن قىلمىستىق جاۋاپكەرشىلىك تۋرالى كونۆەنتسياسىن راتيفيكاتسيالاۋعا جول اشادى. بۇل ءوز كەزەگىندە قىلمىسكەرلەردى ەكستراديتسيالاۋ، ولاردىڭ زاڭسىز تاپقان مۇلكىن قايتارۋ ماسەلەلەرى بويىنشا ەۋروپا ەلدەرىمەن ىنتىماقتاستىقتى كۇشەيتۋگە مۇمكىندىك بەرەدى.

 

"The Qazaq Times"