بۇگىن تۇستەن بۇرىن، وڭتۇستىك كورەيا پرەزيدەنتى ءمۇن جاين جاڭا جىلدان كەيىنگى العاشقى رەسمي مالىمدەمەسىن جاساپ، سولتۇستىك كورەيامەن ديالوگتى دامىتاتىنىن جەتكىزدى. ول سولتۇستىك كورەيا باسشىسى كيم جوڭ ۋندى (كيم چەن ىن/Kim Jong Un) وڭتۇستىك كورەياعا رەسمي ساپارلاي كەلۋگە شاقىردى.

وڭتۇستىك كورەيا باسشىسى سونداي-اق، اقش پەن سولتۇستىك كورەيا اراسىندا توقتاپ قالعان كەلىسسوزدى قايتا دامىتۋعا ۋادە بەردى. بۇعان دەيىن سولتۇستىك كورەيا ليدەرى كيم جوڭ ۋن بيلەۋشى پارتياسىنىڭ جينالىسىندا مالىمدەمە جاساپ، امەريكا قۇراما شتاتتارى ءوزىنىڭ دۇشپاندىق ساياساتىنان باس تارتىپ، كورەي تۇبەگىندە تۇراقتى بەيبىتشىلىك جۇيەسىن ورناتقانعا دەيىن، كحدر ءوزىنىڭ ۇلتتىق قاۋىپسىزدىگى ءۇشىن يادرولىق قارۋدى دامىتۋىن جالعاستىرا بەرەتىنىن ايتقان.

وڭتۇستىك كورەيا ليدەرى بۇگىنشى مالىمدەمەسىندە بيىل ماۋسىمدا باستالاتىن توكيو وليمپياداسىندا وڭتۇستىك جانە سولتۇستىك كورەيا دەلەگاتسيالارى بىرگە قاتىسادى دەپ ۇمىتتەنەتىنىن، سونداي-اق، 2032 جىلعى وليمپيادا ويىندارىن ەكى كورەيا بىرلەسىپ وتكىزەدى دەپ ۇمىتتەنەتىنىن جەتكىزدى.

ەكى كورەيانىڭ ليدەرلەرى 2018 جىلى 3 رەت سامميت وتكىزدى جانە ەكى ەل قاتىناسى ءبىرشاما دامي ءتۇستى. بىراق، بىلتىر سولتۇستىك كورەيا ليدەرىن ەلدەرىنە شاقىرعان وڭتۇستىك كورەيانىڭ ءۇمىتى اقتالمادى. يادرولىق قارۋسىزدانۋ ماسەلەسى بويىنشا سولتۇستىك كورەيا جىلى قاباق تانىتپادى.

“The Qazaq Times”