باس پروكۋراتۋرا تاۋەلسىزدىك كۇنىنە قاتىستى قاتاڭ ەسكەرتۋ جاسادى

قر-نىڭ باس پروكۋرورىنىڭ ورىنباسارى بولات دەمباەۆ ەرتەڭ، 16 جەلتوقسان، تاۋەلسىزدىك كۇنى ءوتۋى مۇمكىن ميتينگكە قاتىسۋشىلاردىڭ "جازالاناتىنىن" ەسكەرتتى.

قازاقستان بيلىگى حالىققا 16 جەلتوقساندا ميتينگىگە شىقپاۋ تۋرالى ەسكەرتۋ ماندەگى ۇندەۋ جاسادى. دەمباەۆتىڭ رەسمي مالىمدەمەسىندە «باس پروكۋراتۋرانىڭ ءتۇسىندىرۋ جۇمىسىنا قاراماستان جەكە ادامدار، سونىڭ ىشىندە شەتەلدە جۇرگەندەر الەۋمەتتىك جەلى ارقىلى الدا كەلە جاتقان مەرەكە كۇنى زاڭسىز ميتينگىگە شاقىرىپ جاتىر. بۇل ادامدار «بەيبىت ميتينگ وتكىزۋ» زاڭىن بۇزىپ وتىر. ولار زاڭعا ساي ميتينگ وتكىزەتىندەرىن ايتىپ، ون كۇن بۇرىن جەرگىلىكتى ورگاندارعا ءوتىنىش بەرگەن جوق» دەلىنگەن.

ۆەدومستۆو وكىلى «ميتينگ تۋرالى حابارلانعانعا دەيىن ۇيىمداستىرۋشىلار بەلگىلەنگەن كۇنگە دەيىن 10 كۇن بۇرىن جەرگىلىكتى اتقارۋشى ورگاندارعا جازباشا ءوتىنىش بەرمەگەنىن» العا تارتا وتىرىپ، ەرتەڭ ءوتۋى مۇمكىن تاعزىم جيىنىن «زاڭ تالابىن ايقىن بۇزادى» دەپ بىلەدى.

قىسقا قايىرىپ ايتقاندا، پروكۋراتۋرا «تاۋەلسىزدىك كۇنى سانكتسيالانباعان ميتينگ ۇيىمداستىرۋشىلار مەن قولداۋشىلار ارەكەتىندە اكىمشىلىك قۇقىق بۇزۋشىلىق بايقالادى، ال ولار قاندايدا ءبىر ەلەۋلى زيان كەلتىرسە – قىلمىستىق جاۋاپقا تارتاتىنىن» ەسكەرتكەن. باس پروكۋروردىڭ ورىنباسارىنىڭ سوزىنشە، ەل حالقىن  «ارانداتۋشىلىق جاساماۋعا، قولدانىستاعى زاڭنامانى مۇلتىكسىز ساقتاۋعا جانە زاڭسىز ميتينگىلەرگە قاتىسۋدان باس تارتۋعا شاقىرادى».

ادەتتە، قازاقستان بيلىگى رۇقسات ەتىلمەگەن ميتينگ-شەرۋلەرگە قاتىسۋشى ازاماتتاردى جاپپاي ۇستاپ، ولاردى "زاڭ شەڭبەرىندە" ءارتۇرلى جاۋاپكەرشىلىككە تارتادى. قازاقستان سوتى تىيىم سالعان «قازاقستاننىڭ دەموكراتيالىق پارتياسى» شاقىرعان جالپىۇلتتىق شەرۋدى قۇزىرلى ورگاندار زاڭسىز دەپ سانايدى. 1986 جىلى جانە 2011 جىلى بولعان قايعىلى وقيعا كۇنى ەلدەگى «ويان، قازاقستان»، «قازاقستاننىڭ دەموكراتيالىق پارتياسى» جانە «حالىق قۇرىلتايى» ازاماتتىق-ساياسي قوزعالىستارى دا الاڭعا تاعزىم ەتۋگە شىعاتىنىن حابارلاعان ەدى.

"The Qazaq Times"