تۇركيا مايكل فلينن ارقىلى فەتحۋللاح گۇلەندى اقش-تان الىپ كەتپەك بولعان

وسىدان بۇرىن ترامپتىڭ العاش رەت ءوزىنىڭ مەملەكەت قاۋىپسىزدىگى جونىندەگى كەڭەسشىسى رەتىندە تاعايىنداعان مايكل فلينن، رەسەيدىڭ اقش-تاعى رەسمي تۇلعالارىمەن تەلەفون ارقىلى تىلدەسىپ، اقش-تىڭ مەملەكەتتىك قۇپيالىقتارىن تالقىلادى دەپ ايىپتالىپ، جۇمىستان قۋىلعان ەدى. الايدا، مايكل فليننىڭ لاڭى ونىمەن باسىلا قويماپتى. ونىڭ بۇدان باسقا دا «تەنتەكتىكتەرى» ول جۇمىستان كەتكەننەن كەيىن دە انىقتالىپ جاتىر. 24 ناۋرىز كۇنى اقش ورتالىق بارلاۋ كوميتەتىنىڭ باسشىسى دجەيمس ۆۋلسي ونىڭ باسقا دا اقش مۇددەسىنە قايشى قىلىقتارىن اشكەرە ەتتى.

ءۆۋلسيدىڭ مالىمەتىنە قاراعاندا، وتكەن جىلى قىركۇيەك ايىندا مايكل فلينن ترامپنىڭ سايلاۋ ناۋقانى جۇمىسى بارىسىندا، نيۋ-يورك قالاسىنداعى ءبىر قوناق ۇيدە تۇركيانىڭ رەسمي تۇلعالارىمەن كەزدەسكەن. كەزدەسۋ بارىسىندا ول تۇركيالىق تۇلعالارمەن اقش-تا تۇراتىن «گۇلەنشىلەردىڭ» باسشىسى فەتحۋللاح گۇلەندى تۇركياعا قايتارۋ ءىسى تۋرالى كەڭەسكەن. ءفليننىڭ حابارلاۋشىسى بۇل ايىپتاۋدان كەيىن بىردەن تەرىسكە شىعارىپ مالىمدەمە جاسادى. بۇل تۋرالى News.Cn حابارلايدى.

ۆۋلسي 24 ناۋرىزدا تانىمال “The Wall Street Journal” باسىلىمىنا بەرگەن سۇحباتىندا، وتكەن جىلى قىركۇيەكتە ترامپتىڭ سايلاۋ ناۋقانى تۇسىندا مايكل فلينن تۇركيا پرەزيدەنتى رەجەپ تايپ ەردوعاننىڭ كۇيەۋ بالاسى جانە تۇركيا سىرتقى ىستەرمينيسترى مەۆليۋت چاۆۋشوگلۋمەن كەزدەسكەنىن ايتتى. سونىمەن بىرگە فەتحۋللاح گۇلەندى زاڭدى تۇردە ۇستاپ بەرۋ جانە تۇركياعا قايتارۋ تۋرالى اقىلداسقان دەدى.

تۇركيا ۇكىمەتى وتكەن جىلى شىلدە ايىندا تۋىلعان توڭكەرىستىڭ پەردە ارتىنداعى ۇيىمداستىرۋشىسى فەتحۋللاح گۇلەن دەپ تاۋىپ وتىر. گۇلەن بولسا ءوزىنىڭ 1999 جىلدان بەرى اقش-تا تۇراتىنىن كولدەنەڭ تارتىپ، بۇل ايىپتاۋدى تەرىستەگەن بولاتىن. سوندىقتاندا اقش-تان گۇلەندى تۇركياعا قايتارىپ بەرۋدى تالاپ ەتەدى. الايدا، اتالمىش دەموكراتيا مەن ادامدىق قۇقىقتى جاقتاۋشى امەريكا تۇرىك بيلىگىنىڭ بۇل تالابىنا تويتارىس بەرىپ كەلەدى. ال ورتالىق بارلاۋ كوميتەتىنىڭ باستىعى ءۆۋلسيدىڭ ايتىسىنا قاراعاندا فلينن جانە ءبىر كومپانيا تۇركيا جاقتىڭ تالابىن ورىنداۋعا تىرىساتىن بولعان.

«Associated Press» باسىلىمىنىڭ حابارىنا قاراعاندا، ناۋرىز ايىنىڭ باس شەنىندە فلينن جانە اتالمىش كومپانيا اقش ادىلەت دەپارتامەنتىنە گۇلەندى قايتارۋ تۋرالى قۇجاتتاردى ۇسىنعان. سونداي اق ول جۇمىس جاساسقان تۇرىك تۇلعالارىنىڭ كومپانياسىنان 530 مىڭ اقش دوللارى اۋدارىلعان. دەسە دە، مايكل فليننىڭ راستاۋىنسىز، ونىڭ ەكى ەلدىڭ وكىلدەرىمەن جەكەلەي بايلانىستا بولۋى، ونىڭ اق ۇيدەگى «ەرەكشە قىزمەتكەر» ەكەنىن ءبىلدىرىپ تۇرسا كەرەك. ورتالىق بارلاۋ كوميتەتىنىڭ مايكل ءفليننىڭ سارى ىزىنە ءشوپ سالۋىندا دا كوپ سىردىق جاتقانى انىق. ول مۇمكىن رەسەي، تۇركيا رەسمي تۇلعالارىنا اقش-تا تۇراتىن وزگە كۇشتەردىڭ مۇددەسى ءۇشىن بايلانىس ورناتىپ ءجۇرۋى دە بەك مۇمكىن. سەبەبى، امەريكا مۇددەسىن بەلدەن باسقان مايكل فلينن ءالى كۇنگە دەيىن اق ۇيدەن ءزىلدى ءسوز بەن شاراعا ۇشىراماي كەلە جاتىر.

“The Qazaq Times”