جۋرناليستەردى قورعاۋ كوميتەتىنىڭ (The Committee to Protect Journalists/CPJ) بۇگىن جاريالاعان ەسەبىندە قىتايدى 2019 جىلى جۋرناليستەرگە ەڭ كوپ قىسىم كورسەتكەن ەل رەتىندە اتادى. اتالعان كوميتەت مالىمەتىنە قاراعاندا بيىل قىتايدا كەمىندە 48 جۋرناليست قاماۋعا الىنعان.

جۋرناليستەردى قورعاۋ كوميتەتى مالىمەتىندە، قازىرگى قىتاي باسشىسى شي جينپيڭ تۇسىندا جۋرناليستەرگە جانە باق وكىلدەرىنە باقىلاۋ مەن قىسىمنىڭ بارعان سايىن كۇشەيىپ، قاماۋعا الىنعان جۋرناليستەر سانى كۇن سايىن ءوسىپ جاتقانى ايتىلادى. بىلتىر دا قىتاي بيلىگى 47 ءجۋرناليستى قاماۋعا العان.

بۇدان تىس، CPJ ەسەبىندە شىنجاڭداعى ساياسي جاعدايلارعا بايلانىستى قاماۋعا الىنعان جۋرناليستەر سانى دا كوپ. ولاردىڭ اراسىندا بۇدان بىرنەشە جىل بۇرىن جاساعان جۋرناليستىك جۇمىستارى ءۇشىن جازاعا ۇشىراعان باق وكىلدەرى دە بار.

CPJ مالىمەتىنە سەنسەك قىتايدا قاماۋعا الىنعان جۋرناليستەردىڭ 98 پايىزى ۇلتتىق تاقىرىپتاردى كوتەرگەنى ءۇشىن جازالانعان. ولاردىڭ اراسىندا 2 امەريكالىق جۋرناليس تە بار.

زەرتتەۋ ەسەبىنە قاراعاندا، 2019 جىلى الەمدە 255 جۋرناليست قاماۋعا الىنعان، بۇل رەكوردتىق كورسەتكىشكە جاقىن. جۋرناليستەرگە قىسىم كورسەتۋ ءىسى بويىنشا ەكىنشى ورىندا تۇركيا تۇر. تۇرىك بيلىگى بيىل 47 ءجۋرناليستى تۇرمەگە جاپقان. ءۇشىنشى  ساۋد ارابياسى مەن ەگيپەت قاتار تۇر، ءار قايسىسىندا 26 جۋرناليست قاماۋعا الىنعانى تۋرالى دەرەك بار.

ايتا كەتەيىك، نيۋ-يوركتە ورنالاسقان جۋرناليستەردى قورعاۋ كوميتەتى 1990 جىلدان بەرى جىل سايىن تۇتقىندالعان جۋرناليستەردىڭ سانىن كورسەتىپ كەلەدى. ۇيىمنىڭ باستى ماقساتى – جاھاندىق ماسشتابتا ءباسپاسوز بوستاندىعى مەن جۋرناليستەردىڭ قۇقىقتارىن ناسيحاتتاۋ جانە قورعاۋ.

“The Qazaq Times”