ۇلىبريتانيا پارلامەنتتىك سايلاۋعا دايىندىقتى باستادى

بىرىككەن كورولدىكتە مەرزىمىنەن بۇرىن پارلامەنتتىك سايلاۋعا دايىندىق باستالدى، – دەپ حابارلايدى The Guardian.

لەيبوريستىك پارتيانىڭ جەتەكشىسى دجەرەمي كوربيننىڭ ايتۋىنشا، پرەمەر-مينيستر بوريس دجونسون بريۋسسەلمەن ورتاق كەلىسىمگە كەلە الماۋى مۇمكىن. سول سەبەپتى كەزەكتەن تىس پارلامەنتتىك سايلاۋ وتكىزىلمەك.

اتالعان ساياسي شارا بيىل 12 جەلتوقساندا وتەدى. بريتانيا پرەمەر-ءمينيسترى بوريس دجوننىڭ ايتۋىنشا، ساياسي داعدارىستان الىپ شىعۋدىڭ بىردەن ءبىر جولى – مەرزىمىنەن بۇرىن پارلامەنتتىك سايلاۋ وتكىزۋ. سونىمەن قاتار، سايلاۋدان كەيىن بىرىككەن كورولدىكتىڭ ەۋروپالىق وداقپەن Brexit كەلىسىمى توڭىرەگىندەگى داۋ جانە سولتۇستىك يرلانديامەن شەكارا ماسەلەسى دە شەشىم تابادى.

ۇلىبريتانيا ەو-دان بيىل 29 ناۋرىزدا، ياعني قاۋىمداستىقتان شىعۋ تۋرالى جازباشا حابارلاما بەرىلگەننەن كەيىن ەكى جىل وتكەن سوڭ كەتۋى كەرەك ەدى. الايدا بريتان پارلامەنتى قاۋىمدار پالاتاسىنىڭ دەپۋتاتتارى بريۋسسەل مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن Brexit شارتتارى تۋرالى كەلىسىمنىڭ جوباسىن ءۇش رەت كەرى قايتارعان. ناتيجەسىندە ەۋروپالىق وداق Brexit-ءتى الدىمەن ءساۋىر نەمەسە مامىرعا، سودان كەيىن 31 قازانعا بەكىتۋگە كەلىستى. الايدا Brexit كەلىسىمى كەزەكتى مارتە باسقا ۋاقىتقا اۋىستىرىلدى. بۇل دەگەنىمىز، ەلدە ساياسي داعدارىستىڭ ورىن الىپ جاتقانىن بىلدىرەدى.

"The Qazaq Times"