بيلىك بەلسەندىلەرگە جەلتوقسان-جاڭاوزەن وقيعالارىن ەسكە الۋعا رۇقسات بەرە مە؟

بۇگىن ەلوردالىق ءبىر توپ بەلسەندى پوليتسيا دەپارتامەنتىنە بارىپ، جەلتوقسان جانە جاڭاوزەن وقيعاسى قۇرباندارىن ەسكە الۋعا مۇرسات بەرۋىن، وزدەرىن قۋدالاماۋىن سۇرادى.

ازاتتىق تاراتقان اقپاراتقا سايكەس، بەلسەندىلەر «16 جەلتوقساندا كونستيتۋتسيالىق قۇقىقتارىن پايدالانىپ، ميتينگىگە شىققىسى كەلەدى». الدىن-الا قامدانىپ جاتقان ازاماتتاردىڭ ايتۋىنشا، «ميتينگ قارساڭىندا بەلسەندىلەردىڭ ءۇيىن اڭدىپ، ولاردى كوشەدەن ۇستاۋ – پوليتسيانىڭ ادەتى».

وقيعا ورنىندا بولىپ قايتقان ازاتتىق ءتىلشىسىنىڭ حابارلاۋىنشا:

– 1986 جىلعى جەلتوقسان جانە 2011 جىلعى جاڭاوزەن وقيعاسى قۇرباندارىن ەسكە الۋعا قۇقىعىمىز بار. نەگە سۇتكە، نانعا، دارىگە شىققان جەرىمىزدەن الىپ كەتەسىڭدەر؟ [جەلتوقسان جانە جاڭاوزەن وقيعاسى كەزىندە] مەنىڭ تۋىستارىمنىڭ بالالارى ءولدى، تانىس-دوستارىمنىڭ جاقىندارى ءولدى. گۇل شوعىن قويۋ – مەنىڭ پارىزىم. قۇران وقۋعا مۇددەلىمىن. 16 جەلتوقساندا بىزگە تيىسپەڭدەر! – دەگەن نارازىلاردىڭ ءبىرى پوليتسەيلەرگە.

پوليتسيا دەپارتامەنتى عيماراتىنىڭ تىركەۋ زالىندا «وزدەرىن اڭدىپ، ىزىنە تۇسكەن، قۋدالاعان» پوليتسەيلەردىڭ سۋرەتىن ۇستاپ تۇرعان بەلسەندىلەر سەبەپسىز ايىپتاپ، ءجونسىز قۋدالاۋدى توقتاتۋدى تالاپ ەتتى. ارتىنشا نارازىلار الدىنا كەلگەن استانالىق پوليتسيا دەپارتامەنتى توراعاسىنىڭ ءبىرىنشى ورىنباسارى باقىتجان مالىباەۆ شىقتى. ونىڭ مەكەمە زالىنا كىرىپ تالقىلاۋ تۋرالى ۇسىنىسىنان بەلسەندىلەر باس تارتىپ، ءوز نارازىلىعىن ءبىلدىردى.

بۇعان دەيىن 1986 جىلى 16-17 جەلتوقسان كۇندەرى قازاق ستۋدەنت جانە جۇمىسشى جاستارى كرەملدىڭ قوناەۆتىڭ ورنىنا كولبيندى  تاعايىنداۋىنا قارسىلىق تانىتىپ، الماتىداعى ۇكىمەت ءۇيىنىڭ الدىنا بەيبىت ميتينگكە شىققان. اياۋسىز جانشىلعان شەرۋگە قاتىسۋشىلاردىڭ بىرنەشەۋى كوز جۇمسا، كوپشىلىگى قۋعىندالىپ، وقۋ-پارتيا، قىزمەتىنەن بوساتىلعان. سونداي-اق اۋىر جاراقات العاندار دا جەتەرلىك. ال تاۋەلسىزدىك جىلدارى، انىعى 2011 جىلدىڭ 16 جەلتوقسانى جاڭاوزەن مۇنايشىلارى ەڭبەك داۋىنان باستالعان جارتىجىلدىق قارسىلىق-اشتىق اكتسيالارىنان سوڭ باس كوتەرگەن بولاتىن. ەرەۋىلدە پوليتسيا مۇنايشىلارعا وق اتىپ، سالدارىنان رەسمي مالىمدەمە بويىنشا 17 ادام كوز جۇمىپ، جۇزدەن اسا كىسى اۋرۋحاناعا جۇگىنگەن.

ادەتتە، تاۋەلسىزدىك كۇنى قارساڭىندا ەلدە ويىن-ساۋىقتىق ءىس-شارالار كوپتەپ ۇيىمداستىرىلىپ، تاريحي-يدەولوگيالىق شارالار شەتىن قالىپ جاتادى. ءتىپتى الماتىداعى كوللەدجدەر مەن جوو ستۋدەنتتەرىنىڭ جاتاقحاناعا كىرىپ-شىعۋى قيىنداپ، ەكىكۇندىك قاتاڭ تارتىپتەگى باقىلاۋعا الىنادى. بۇل جىلداعى «اشىپ ايتىلمايتىن ايشىقتى داستۇرگە» اينالعالى قاشان.

"The Qazaq Times"