ءماحديدىڭ وتستاۆكاعا كەتۋى يراكتىڭ بيلىك داعدارىسىن شەشە المايدى

يراك پارلامەنتى پرەمەر-مينيستر ءماحديدىڭ وتستاۆكاسىن ماقۇلدادى، ول جۇما كۇنى دوعارىستى قابىلداپ، قىزمەتىنەن كەتتى. الايدا ەكى ايعا جۋىق ۋاقىتتان جالعاسقان نارازىلىق ارەكەتتەرى تولاستار ەمەس. پرەزيدەنت بارحام سالەح ەندى پارلامەنتتەگى ەڭ ۇلكەن توپتان جاڭا پرەمەر-ءمينيستردى تاعايىنداۋدى سۇراپ وتىر.

يراك ۇكىمەتىنىڭ جاڭا پرەمەر-ءمينيسترىن سايلاۋ بىرنەشە اپتاعا سوزىلىپ كەتۋى مۇمكىن. سەبەبى، قايسى پارتيانىڭ باسىمدىققا يە ەكەنى انىق ەمەس. جاڭا ۇكىمەت پەن جاڭا باسشى تاعايىندالعانعا دەيىن ماحدي مەن ول قۇرعان بۇرىنعى ۇكىمەت ۋاقىتشا قىزمەتىن اتقارىپ تۇرماق.

ءماحديدىڭ قىزمەتىنەن كەتۋى يراك ازاماتتارىنىڭ نارازىلىعىن باسا الماسى مۇمكىن. سەبەبى، ولار ءبىر عانا ماحديدىڭ وتستاۆكاسىن تالاپ ەتىپ وتىرعان جوق. ەل بيلىگىنىڭ، بيلىك جۇيەسىنىڭ تولىقتاي وزگەرۋىن ءۇمىت ەتەدى. ولار ەل بيلىگىن «بۇزىلعان جانە يراك بولاشاعىن جاراتۋعا قابىلەتسىز» دەپ سانايدى. ءارى، ولار يراكتاعى كەدەيلىك تاقسىرەتىن تارتىپ وتىرعان حالىقتىڭ ماسەلەسىن شەشە المايدى دەپ قارايدى.

شىنىندا دا، يراكتىڭ وتستاۆكاعا كەتكەن باسشىسى عانا ەمەس، پارتيالارىنىڭ دا سىبايلاس جەمقورلىققا بەلشەسىنەن باتقانى تۋرالى سول ەلدىڭ لاۋازىمدىلارى دا مويىندايدى. العاشقى نارازىلىقتى كۇشپەن باسۋعا ارەكەتتەنگەن باسشىسى اقىرى قىزمەتىنەن كەتتى. الايدا، يراك ۇكىمەتى جەمقورلىق سىندى جەگى قۇرت قاۋساتقان كارى ەمەندەي تەڭسەلىپ تۇر. بۇل جاعداي ءبىزدىڭ دە ەلدە جوق ەمەس.

“The Qazaq Times”