مەركەل ەۋروپانى قىتايعا ورتاق ۇستانىمعا شاقىردى

گەرمانيا كانتسلەرى انگەلا مەركەل كەشە، 27 قاراشادا ەۋروپا ەلدەرىن قىتايعا جانە كەلەسى جىلى ىسكە قوسىلاتىن 5G بايلانىس جەلىسى تۋرالى ورتاق ۇستانىمعا شاقىردى. بۇل تۋرالى "رەيتەر" اگەنتتىگى حابارلاعان بولاتىن. 

گەرمانيانىڭ كەيبىر زاڭ شىعارۋشىلارى قىتايلىق "حۋاۆەي" كومپانياسىن 5g كەلىسىمشارتتارىنان شىعارىپ تاستاعىسى كەلەدى. سەبەبى، امەريكا قۇراما شتاتتارى بارلاۋ قىزمەتى جانە مەملەكەتتىك دەپارتامەنتى اتالعان قىتايلىق كومپانيا بەيجىڭ بيلىگى ءۇشىن تىڭشىلىق ارەكەتتەرمەن اينالىسادى دەپ ەسكەرتكەن بولاتىن. بىراق، رەسمي بەيجىڭ مەن اتالعان قىتايلىق كومپانيا ۋاشينگتوننىڭ ايىپتاۋىن جوققا شىعارىپ كەلەدى.

انگەلا مەركەل كەشە پارلامەنتتىڭ تومەنگى پالاتاسى مۇشەلەرىمەن بيۋدجەتتىك تالقىلاۋ كەزىندە ەۋروپا ەلدەرىنىڭ ورتاق ۇستانىمى تۋرالى باسا ايتتى. "ەڭ ۇلكەن قاۋىپتىڭ ءبىرى – ەۋروپاداعى كەيبىر ەلدەر قىتايعا قاراتا جەكە ساياساتىن جۇرگىزگىسى كەلەدى، بۇل ەۋروپانىڭ قىتايعا قاراتقان كوزقاراسىمەن سايكەس كەلمەيدى", – دەگەن مەركەل حانىم. ول جانە: "بۇل قىتاي ءۇشىن ەمەس، ەۋروپاداعى ءبىز ءۇشىن اپات اكەلەدى" – دەدى. گەرمانيا كانتسلەرىنىڭ ويىنشا، قىتاي جانە جاڭا ۇرپاق بايلانىس جەلىسى تۋرالى ەڭ الدىمەن گەرمانيا مەن فرانتسيا اراسىندا ورتاق ۇستانىم قالىپتاستىرۋ، سوعان سۇيەنە وتىرىپ، تۇتاس ەۋروپالىق ۇستانىمدى قالىپتاستىرۋ كەرەك.

بىراق، فرانتسۋزدىڭ كەيبىر لاۋازىمدىلارى فرانتسيا اقش-تىڭ جولىمەن جۇرمەيدى، قىتايلىق "حۋاۆەيدى" دە شاقىرمايدى، قاۋىپسىزدىك تالاپتارىن قامتاماسىز ەتە الادى دەپ سانايدى. بۇعان قاراتا كانتسلەر مەركەل: 5G-ءدى كەڭەيتۋ كەزىندە بىزگە جوعارى قاۋىپسىزدىك ستاندارتتارى قاجەت ەكەندىگى داۋسىز، بىراق ءبىز وزىمىزگە ستاندارتتاردى بەلگىلەۋىمىز كەرەك، سونىمەن بىرگە باسقا ەۋروپالىق سەرىكتەستەرمەن دە كەلىسۋىمىز كەرەك", – دەدى.

بۇدان بۇرىن فرانتسيا پرەزيدەنتى ەممانۋەل ماكرون قىتايعا رەسمي ساپارمەن بارىپ، بىرقاتار ساۋدا-ەكونوميكالىق كەلىسىمدەرگە قول جەتكىزىپ قايتقان بولاتىن. كەيبىر ساراپشىلار فرانتسيا پرەزيدەنتىنىڭ قادامى ەۋروپانىڭ قىتايعا ۇستانعان پوزيتسياسىن جۇمسارتتى دەگەن پىكىردە.

“The Qazaq Times”