ەڭبەكاقى داۋى: شىمكەنتتىك جۇرگىزۋشىلەر نارازىلىق ءبىلدىردى

بۇگىن تاڭەرتەڭ «شىمكەنت باس اۆتوپاركىنىڭ» 50-گە جۋىق قوعامدىق كولىك جۇرگىزۋشىسى جينالىپ، جۇمىسقا شىعۋدان باس تارتاتىنىن مالىمدەدى.

ازاتتىقتىڭ حابارلاۋىنشا، نارازى جۇرگىزۋشىلەردىڭ نەگىزگى تالابى –  جالاقىنى ۋاقىتىندا الۋ جانە ونى ءوسىرۋ. بەس باعىت بويىنشا جۇرەتىن اۆتوبۋس جۇرگىزۋشىلەرى ءالى كنگە دەيىن قازان ايىنىڭ جالاقىسىن الماعان.

«179 ساعات جۇمىس ىستەدىم. 16 سمەنا. وعان 59 666 تەڭگە شىققان. زەينەتاقىعا 5 666 تەڭگە ۇستادى. تابىس سالىعىن ۇستادى. سوندا 53 مىڭ تەڭگە تازا قولىمىزعا الدىق. وعان قالاي كۇن كورەمىز؟» - دەيدى جۇرگىزۋشى ساكەن ايتۋاروۆ.

«24 ساعات ونىندامىز. كولىك جۋ بار، كاسسا وتكىزۋ بار. تاڭعى ساعات تورتتە تۇرامىز. ءبىر كۇن جوسپار وتكىزبەي كورشى، جۇمىسقا شىعارمايدى. ءبىزدىڭ قادىرىمىز قايدا؟ ايلىعىمىز قايدا؟ ءبىزدىڭ بالا-شاعامىز جوق پا؟ ولاردى قالاي اسىرايمىز؟» - دەيدى كوندۋكتورلاردىڭ ءبىرى.

جينالعان جۇرگىزۋشىلەر الدىنا باس ديرەكتور شىعىپ، جالاقىنىڭ كەشىگىپ جاتقانىن راستاپ، كومپانيانىڭ جاعدايى كۇردەلى ەكەنىن ايتا كەتتى.

«مارشرۋتتاردىڭ 70 پايىزى ءوزىن-ءوزى وتەمەيدى. مۇنى جۇمىسشىلاردىڭ ءبارى بىلەدى. بۇلاردىڭ ايلىقتارىنا جەتپەيدى. بىراق سوعان قاراماستان كەشىكتىرىپ بەرىپ جاتىرمىز»، - دەدى «شىمكەنت باس اۆتوپاركى» كومپانياسىنىڭ ديرەكتورى.

وقيعا ورنىنا پوليتسيا كەلىپ، باقىلاپ تۇر. قالادا 12 باعىت بويىنشا جۇمىس جاسايتىن «شىمكەنت باس اۆتوپاركىندە» 480 جۇمىسشى بار.

"The Qazaq Times"