شاعىمى قاناعاتتاندىرىلماعان وپپوزيتسيالىق ساياساتكەر بۇۇ-عا جۇگىنۋى مۇمكىن

بۇگىن الماتى قالالىق سوتىنىڭ سۋدياسى ءىنجۋ ءۋاليحان وپپوزيتسيالىق ساياساتكەر بالتاش تۇرسىمباەۆتىڭ «زاڭسىز ۇستاۋ» جونىندەگى اپەللياتسيالىق ارىزىن قاناعاتتاندىرمادى. 

بيىلعى كەزەكتەن تىس پرازيدەنت سايلاۋى كەزىندە «سايلاۋدىڭ ليگيتيمدىلىگىنە» كۇمانداناتىن ازاماتتار بەيبىت شەرۋگە شىققان بولاتىن. ءىىم-ءنىڭ دەرەگى بويىنشا، تولقۋ بارىسىندا 4 مىڭعا جۋىق ازامات ۇستالىپ، 677-ءسى سوت ارقىلى اكىمشىلىك قاماۋعا الىنىپ، ال 305-ىنە اكىمشىلىك ايىپپۇل سالىنعان ەدى.

الماتىدا وتكەن بەيبىت شەرۋ ۋاقىتىندا استانا الاڭى (قبتۋ عيماراتىنىڭ الدىندا – رەد.) ماڭىنداعى قوعامدىق تاماقتانۋ ورنىنىڭ بىرىنە كەلگەن بەلگىلى ساياساتكەر بالتاش تۇرسىمباەۆتى پوليتسەيلەر «اي-جايعا قاراماستان» ۇستاپ كەتكەن. ءوزىن قۇقىق قورعاۋ ورگاندارىنىڭ زاڭسىز ۇستاعانىن ايتىپ، سوتقا شاعىمدانعان.

بۇگىن الماتى قالاسىنىڭ سوتىندا اتالعان ارىز بويىنشا سوت وتىرىسى ءوتتى. بار بولعانى جارتى ساعاتقا عانا سوزىلعان پروتسەسكە جاۋاپكەر تاراپ قالالىق پوليتسيا دەپارتامەنتىنەن ەشكىم كەلمەدى. سۋديانىڭ رۇقساتىمەن ءسوز العان تۇرسىمباەۆ: بۇل سوت جۇيەسى، بيلىك، پوليتسيا، پروكۋراتۋرا، ۇقك ءبىزدىڭ حالىقتىڭ جۋاستىعىن پايدالانىپ وتىر. قازىر ەشقانداي ميتينگى بوپ جاتقان جوق. بىراق بەلسەندىلەردى الىپ كەتىپ، كەيبىرەۋلەرىن 5-10 كۇنگە قاماپ جاتىر. بۇنىڭ بارلىعى ۇيات، ماسقارا، – دەدى.

ال قورعاۋشى-زاڭگەر مارجان اسپاندياروۆانىڭ سوزىنشە، كۇشتىك قۇرىلىم وكىلدەرى ساياساتكەردىڭ ىزىنە ءتۇسىپ، زاڭسىز باقىلاۋعا العان. سەبەبى ۇستاۋ بارىسىندا پوليتسيا ونىڭ قاي جەردە، كىممەن جانە نە ىستەپ جۇرگەنىن بىلگەن كورىنەدى. «تۇرسىنباەۆتىڭ زاڭسىز ۇستالعانىنا ونى پوليتسيا قىزمەتكەرلەرىنىڭ ەشقانداي قۇجات تولتىرماستان بوساتۋى دالەل. ەگەر ول زاڭ بۇزىپ، قىلمىس جاساعانى ءۇشىن ۇستالسا، بۇلاي بولماس ەدى...»، – دەدى ادۆوكات. ونىڭ ويىنشا سوت «شەشىمنىڭ ساياسي استارى بار».

تۇرسىمباەۆتىڭ اپەللياتسيالىق ارىزىن قاراعان الماتى قالالىق سوتىنىڭ سۋدياسى ءىنجۋ اليحانقىزى بۇعان دەيىنگى №2 المالى اۋداندىق سوتىنىڭ شەشىمىن ەش وزگەرتۋسىز قالدىردى.

قايتا قۇرۋ كەزىندە جوعارى ينستانتسيالاردا لاۋازىمدى قىزمەت اتقارعان(1991-92ج. قازاق سسر-ءى ۆيتسە-پرەمەرى، 1992-93ج. اۋىل شارۋاشىلىق ءمينيسترى، 1995-96ج. قاۋىپسىزدىك كەڭەسى حاتشىسى) وپپوزيتسيالىق بەلسەندى «الدىن الا شەشىلىپ قويعان سوت ۇكىمىنە» نارازى ەكەنىن ايتىپ، الداعى ۋاقىتتا «جوعارعى سوتقا، ودان ناتيجە بولماسا، بۇۇ-عا شاعىمدانامىز» دەدى.

"The Qazaq Times"