بەلارۋس پرەزيدەنتى رەسەيمەن ساۋدا تەڭسىزدىگىن سىنعا الدى. بەلارۋس تاۋارلارى رەسەي بازارلارىنا جەتپەي جاتقاندىقتان، ساۋدا تەڭسىزدىگى ءار جىلى 9 ملرد اقش دوللارىن قۇراپ وتىرعانىن ايتتى.

«قانداي دا ءبىر ۇيىمدارعا نازار اۋدارساڭىز، اي سايىن، جىل سايىن جاقسارىپ جاتقانىن كورەسىز. ال، بىزدە نە بولىپ جاتىر؟ بىزگە جىل سايىن جاڭا شارتتار قويىپ جاتىر. ناتيجەسىندە ءبىز ەكونوميكالىق شىعىن تارتىپ وتىرمىز»، – دەدى بەلارۋس پرەزيدەنتى الەكساندر لۋكاشەنكو

قازىر رەسەي مەن بەلارۋس اراسىندا ارنايى جۇمىس توبى قۇرىلىپ، ولار ينتەگراتسيانى تەرەڭدەتۋ بويىنشا جول كارتاسىن دايىنداپ جاتقانى بەلگىلى. تاراپتار بۇل قۇجاتقا 8 جەلتوقسان قول قويۋى مۇمكىن ەكەن. بىراق، لۋكاشەنكو كەلىسىمدەر ەلىنىڭ اتا زاڭىنا (كوستيتۋتسياسىنا) قايشى بولاتىن بولسا، بىردە ءبىر كەلىسىمگە قول قويمايتىنىن ەسكەرتتى.

«شىبىن تۋلادى ەكەن دەپ شىنى سىنباس». لۋكاشەنكونىڭ اندا-ساندا رەسەيگە كورسەتەتىن وقىس مىنەزىن كەيبىر ساراپشىلار ەل ىشىندەگى ساياسي ۇپاي ءۇشىن جاسالعان دەپ سانايدى. ايتالىق، كەزەكتى باتىل پىكىرلەرى الداعى پرەزيدەنت سايلاۋ الدىنداعى «بالل جيناۋ» ءۇشىن جاساپ وتىرعان ارەكەتى دەپ ەسەپتەيدى.

دەي تۇرعانمەن، رەسەي باس بولعان ەۋرازيا ەكونوميكالىق وداعى توڭىرەگىندە لۋكاشەنكونىڭ ايتىپ وتىرعان ءۋاجى شىن. رەسەيدەن وزگە بارلىق ەلدەردە دە وسىنداي ساۋدا تەڭسىزدىگىنە ۇشىراپ وتىر. پايدانى ورىس تاۋىپ، وزگەسى شىنعىن ارقالايتىن وداقتىڭ ەرەجەلەرى دە قۇبىلمالى.

وتكەن اپتالاردا رەسەي قازاقستان مەن قىرعىزستاننان كىرگەن 138 توننا كوكونىس، جەمىس-جيدەك ونىمدەرىن شەكاراسىنان كىرگىزبەي تاستادى. ونداعى ءۋاجى قۇجاتتارى تولىق ەمەس جانە ساپا تولىمدىلىعى جوق دەگەن.

رەسەيدىڭ وزىنە ىڭعايلى ەرەجەلەر ارقىلى ساۋدا تەڭسىزدىگىن تۋدىرعان ارەكەتتەرىنە قاراپ لۋكاشەنكو: «بۇنداي وداقتىڭ نە كەرەگى بار!»، – دەگەن پىكىرىن دە ايتقان.

“The Qazaq Times”