قازاقستان مەديتسيناسىنىڭ كۇندەرى ءوتتى. فوتو: ن. تۇرعانبەك.

بىشكەكتە 13-14 قاراشادا قىرعىز رەسپۋبليكاسىنداعى قازاقستان مەديتسيناسىنىڭ كۇندەرى ءوتتى. بۇل ءىس-شارا قازاقستان جانە قىرعىزستاننىڭ مەديتسينالىق ۇيىمدارىنىڭ اراسىنداعى سەرىكتەستىك پەن ءوزارا قارىم-قاتىناستى نىعايتۋعا باعىتتالعان.

فوتو: ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ ءباسپاسوز قىزمەتى.

قازاقستاندىق دەلەگاتسيانىڭ قۇرامىندا قر دەنساۋلىق ساقتاۋ مينيسترلىگىنىڭ، جەتەكشى مەديتسينالىق ورتالىقتاردىڭ، مەملەكەتتىك جانە جەكە دەنساۋلىق ساقتاۋ ۇيىمدارىنىڭ، جوو-لاردىڭ، فارماتسەۆتيكالىق ونىمدەردى وندىرۋشىلەردىڭ، مەديتسينالىق قوعامداردىڭ جەتەكشى ماماندارى بار. قازاقستاندىق دەلەگاتسيانىڭ باسشىسى — قر دەنساۋلىق ساقتاۋ ءمينيسترى ەلجان ءبىرتانوۆ.

فوتو: ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ ءباسپاسوز قىزمەتى.

ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىن باسقارما توراعاسىنىڭ مىندەتىن اتقارۋشى بايماحانوۆ بولاتبەك بيمەندەۇلى تانىستىردى. بولاتبەك بەيمەندەۇلى جوعارى دەڭگەيدەگى وسى سەسسيادا «قازاقستان رەسپۋبليكاسىنداعى ورگاندىق ترانسپلانتاتسيا» تاقىرىبىندا بايانداما جاسادى. سونداي-اق، ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعى قىرعىز رەسپۋبليكاسى دەنساۋلىق ساقتاۋ مينيسترلىگىنىڭ ۇلتتىق حيرۋرگيا ورتالىعىمەن، قىرعىزستان گەپاتولوگتار قاۋىمداستىعىمەن، قىرعىز رەسپۋبليكاسىنىڭ انا مەن بالانى قورعاۋ ۇلتتىق ورتالىعىمەن سەرىكتەستىك تۋرالى مەموراندۋمعا قول قويدى. وسى ەكى جاقتى سەرىكتەستىك پەن ىنتىماقتاستىق تۋرالى مەموراندۋم قازاقستان مەن قىرعىزستان اراسىنداعى ارىپتەستىكتىڭ دامۋىنا، سونىمەن قاتار مەديتسينالىق ۇيىمداردىڭ ينتەللەكتۋالدىق جانە يننوۆاتسيالىق رەسۋرستارىنىڭ ارتۋىنا ىقپال ەتەدى.

اتالمىش ءىس-شارانىڭ ەكىنشى كۇنى «گەپاتولوگيانىڭ وزەكتى ماسەلەلەرى» تاقىرىبىندا شەبەرلىك ساباقتارى وتكىزىلدى. ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ پروفەسسورى ءىلياسوۆا بيبىگۇل ساپاربەكقىزى مىناداي تاقىرىپتاردا بايانداما ۇسىندى:

  1. قازاقستانداعى ۆ ۆيرۋستىق گەپاتيتىنىڭ جانە دەلتا-اگەنتى بار ۆ ۆيرۋستىق گەپاتيتىنىڭ كۇشەيۋ فاكتورلارى.
  2. ترانسپلانتاتسيالىق گەپاتولوگيانىڭ ماسەلەلەرى. نەگىزگى ناتيجەلەر.
  3. قىرعىزستانداعى گەپاتولوگيانىڭ وزەكتى ماسەلەلەرى.

سونداي-اق ا.ن. سىزعانوۆ اتىنداعى ۇعحو-نىڭ ماماندارى باۋىر اۋرۋلارىنا شالدىققان ناۋقاستارعا تەگىن كونسۋلتاتسيالار ۇيىمداستىردى. كەيبىر كلينيكالىق جاعدايلار قاراستىرىلدى.

“The Qazaq Times”