اقتاۋداعى جاڭا جىلدىق شىرشا. فوتو: لادا

اقتاۋ قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى قايرات اقىباەۆ جاڭاجىلدىق شىرشالاردى ورناتۋعا جانە بەزەندىرۋگە بيۋدجەتتەن 37 ملن تەڭگە بولىنگەنىن مالىمدەدى.

شەنەۋنىكتىڭ سوزىنشە، بيىل شىرشالاردى ورناتۋدى «كەرۋەن فاراب ساۋدا» جاۋاپكەرشىلىگى شەكتەۋلى سەرىكتەستىگى ۇتىپ العان. بۇل كومپانيا بارلىق جۇمىستى 21 ميلليون تەڭگەگە جاساپ بەرەتىنىن ايتقان.

«بۇل سوماعا ءبارى كىرەدى. اتاپ ايتقاندا، شىرشانى ساتىپ الۋ، ونى بەزەندىرۋ، ىلەتىن ويىنشىقتارى بار. بىلتىردان قالعاندارىن دا قولدانامىز. وتكەن جىلى بيۋدجەتتەن تىس 7 ميلليون تەڭگەگە گيرلياندالار ساتىپ العان ەدىك. بۇل جابدىقتىڭ 70 پايىزدان استامى ساقتالعان، ياعني ولار دا پايداعا اسادى»، – دەيدى قايرات اقىباەۆ.

مەرەكەلىك شىرشالار 4-شاعىناۋدانداعى قالا اكىمدىگىنىڭ الاڭى، 15-شاعىناۋدانداعى تەڭىز جاعالاۋى جانە 34-شاعىناۋدانداعى «دوستىق ءۇيىنىڭ» الدىنا ورناتىلاتىن كورىنەدى.

جاڭاجىلدىق بەزەندىرۋ جۇمىستارىنىڭ قارقىندىلىعى سونشالىق وتىز جىل بويى قازاقستاننىڭ باستى تاريحي كۇنى تاۋەلسىزدىك كۇنى ەلىرگەن دۇرمەكتىڭ تاساسىندا ەلەۋسىز، ەسكەرۋسىز قالىپ كەلەدى. وقۋ ورىندارىنداعى «اشىق تاربيە ساعاتى» دەڭگەيىنەن اسا المايتىن «ۇلىقتاۋ شاراسى» 16 جەلتوقساندى ءوز بيىگىنە كوتەرە الماي وتىر. 1 جەلتوقسان تۇڭعىش پرەزيدەنت كۇنى مەن 31 جەلتوقسان جاڭا جىل مەرەكەسىنىڭ ورتاسىندا قالىڭ شاباندوزدار اراسىندا شاڭعا بوگىپ، كومەسكىلەنىپ كەمىستىڭ كۇيىن كورگەلى وتىز جىلعا تايادى.

ەستەرىڭىزدە بولسا، بىلتىر شىمقالادا تەك كوشەلەردى بەزەندىرۋگە قالا بيۋدجەتىنەن 70 ميلليون تەڭگە بولىنگەن بولاتىن. سول كەزدەگى شاھار باسشىسى عابيدوللا ءابدراحيموۆ سەۋلگە ساپارىنان سوڭ 2015 جىلعى جاڭا جىلدى تويلاۋعا قارسى شىققانىن ۇمىتىپ، ول ويىنان اينىپ، بۇل سومانىڭ ءوزىن ازسىنعانى ەلدىڭ ەسىندە. ال وڭتۇستىك استانا الماتى اكىمدىگى وسى ماقساتتا 2017 جىلى 175 ميلليون تەڭگە، بىلتىر  75 ميلليون تەڭگەگە شىعىندالعان ەدى. بيىل قالاي بولارى الداعى ۋاقىتتىڭ ەنشىسىندە.

"The Qazaq Times"