كورنەكى سۋرەتتە زارداپ شەككەن بەلسەندى گالينا ارزاماسوۆا. فوتو: كوكشەتاۋ-ازيا

تالعارلىق بەلسەندى گالينا ارزاماسوۆا وق اتۋ «ءىسى بويىنشا كۇدىككە ىلىنگەن پانفيلوۆ اۋىلدىق وكرۋگىنىڭ بۇرىنعى ءاكىمى نۇرعالي اپپازوۆ قاماۋعا الىنعانىن» جەتكىزدى.

ۇيىمداسقان قىلمىستىق توپتان زارداپ شەككەن گالينا ارزاماسوۆا ازاتتىققا  «بۇگىن جەمقورلىقپەن كۇرەس ءىس-قيمىل اگەنتتىگىنىڭ ىشكى قاۋىپسىزدىك اپپاراتى دەپارتامەنتىنىڭ جەتەكشىسى مۇرات قارىمساقوۆ حابارلاسىپ، مەنىڭ ءوتىنىشىم بويىنشا اپپازوۆتىڭ ۋاقىتشا قاماۋ يزولياتورىنا قامالعانىن ايتتى. ەندى سوت بولادى، ونى قانشا ۋاقىتقا قامايتىنىن شەشۋى ءتيىس» دەگەن.

ارزاماسوۆانىڭ ايتۋىنشا، «ءارتۇرلى مۇددەلى» توپتاردىڭ ارالاسۋىمەن ءىس سيىرقۇيىمشاقتانىپ» كەتكەن. ال جابىرلەنۋشىگە «شابۋىل جاساۋعا تاپسىرىس بەرگەن»، ءتىپتى «ءۇيىنىڭ اۋلاسىنا مولوتوك (جانارمايعا تولى بوتەلكە) لاقتىرىپ، تاپانشامەن بىرنەشە وق اتۋىن» بۇيىرعان اۋىل اكىمى مەن ونىڭ «بۇيرىعىن ەكى ەتپەيتىن» جۇرگىزۋشىسى  پروكۋرور وقىعان ايىپتاۋ اكتىسىمەن تولىق كەلىسپەيدى.

پانفيلوۆ اۋىلدىق وكرۋگىنىڭ اكىمى نۇرعالي اپپازوۆ پەن جۇرگىزۋشىسى سمانوۆ كۇدىكتى رەتىندە قامالىپ، ەكى ايدان سوڭ كەپىلمەن بوساتىلعان. ولارعا بىلتىر جازدىڭ سوڭىنا تامان قارابۇلاق اۋىلىنىڭ تۇرعىنى، بەلسەندى گالينا ارزاماسوۆا تالعار اۋدانى اكىمدىگىنە كىرى بەرىستە پنەۆماتيكالىق مىلتىقپەن وڭ جاق جامباس تۇسىن جارالاعانى ءۇشىن بىرقاتار ايىپ تاعىلۋى ءتيىس. بەلسەندى اۋدان اكىمىنىڭ قابىلداۋىنا قارابۇلاقتاعى مەكتەپ ماڭىنداعى جەردىڭ جەكەمەنشىككە بەرىلگەنىن، جەردى العان ادام ءۇي سالماق بوپ جاتقانىن ايتۋعا كەلگەن بولاتىن.

“The Qazaq Times”