قاماۋدا جاتقان قىرعىزستاننىڭ ەكس-پرەزيدەنتى المازبەك اتامباەۆ ءۇش ايدان بەرى العاش رەت مالىمدەمە جاساعان. اتامباەۆ مالىمدەمەسىندە، 7-8 تامىز كۇندەرى قوي-تاستا (كوي-تاش) بولعان وقيعادان كەيىن بيلىك تارابى زاڭسىز قاماۋلار مەن ساياسي قۋدالاۋ جۇرگىزدى دەپ ايىپتاعان. سونداي-اق، مالىمدەمەدە 7 تامىزداعى قاقتىعىس كۇشتىك قۇرىلىمداردىڭ زاڭسىز ارەكەتتەرىنەن كەيىن پايدا بولعانىن، وسىدان كەيىن ەكس-پرەزيدەنتتى قولداۋشىلار قۋدالاۋعا ۇشىراعانى ايتىلعان.

«وزدەرىنىڭ زاڭسىز ارەكەتتەرىن جاسىرىپ-جابۋعا تىرىسقان ەلدەگى بيلىك تارماقتارى جانە لاۋازىمدى ادامدار بارلىق نارسەنى بىلىقتىرۋدا»، – دەگەن اتامباەۆ مالىمدەمەسىندە. سونداي-اق، اق ءۇيدىڭ زاڭسىز بۇيرىق بەرگەن ادامدارى جاۋاپكەرشىلىكتەن جالتارىپ وتىرعانىن ايتا كەلىپ، نارازى ارەكەت بەيبىت ادامدارعا قارسى وق اتىپ، ەكس-پرەزيدەنتتىڭ ۇيىنە قۇرالدى ادامدار باسىپ كىرگەننەن كەيىن عانا ورىن العانىن ايتادى.

اتامباەۆ قاقتىعىس سەبەپتەرى تۋرالى: «بەيبىت ازاماتتاردىڭ اشۋلانۋىنا جانە نارازى ارەكەتتەرىنە سەبەپ بىرەۋ عانا – ولارعا 7 تامىز كەشتە جانە 8 تامىزدا قۇرالدى شابۋىل جاسالىپ، ناتيجەسىندە جۇزدەگەن ادام زارداپ شەكتى»، – دەپ كورسەتەدى.

قىرعىزدىڭ ەكس-پرەزيدەنتى اتالعان قايشىلىقتى جاعدايلار تولىقتاي قازىرگى  پرەزيدەنتتىڭ ىستەپ وتىرعانى دەپ سانايدى.  «بۇل ءىس-ارەكەتتەردىڭ ءبارى دەرلىك پرەزيدەنت جيەنبەكوۆ (جەەنبەكوۆ) تارابىنان بولىپ جاتىر جانە ونىڭ ماقساتى ەكس-پرەزيدەنت المازبەك اتامباەۆتى جاماناتتى قىلۋ، كوزىن قۇرتا الماعاننان كەيىن ونى مورالدىك جاقتان كۇيرەتۋدى كوزدەيدى»، – دەلىنگەن مالىمدەمەدە.

قاراشانىڭ باسىندا قازىرگى پرەزيدەنت جيەنبەكوۆ قوي-تاستاعى وقيعاعا بايلانىستى جۋرناليستەردىڭ سۇراعىنا جاۋاپ بەرگەندە، بۇل ماسەلە بويىنشا جەكە باعالاۋ جاسامايتىنىن، تەرگەۋ-تەكسەرۋ ناتيجەسى جانە مەملەكەتتىك كوميسسيانىڭ شەشىمىن كۇتەتىنىن ايتقان.

ال، اتالعان شيەلەنىستى وقيعاعا بايلانىستى قۇرىلعان مەم. كوميسسيا ءوز قورىتىندىسىن وسى اپتانىڭ سوڭىنا قاراي جاريا ەتپەك. باس پروكۋراتۋرا بۇرىنعى پرەزيدەنت اتامباەۆقا «زاڭسىز قۇرال پايدالاندى»، «كىسى ءولتىردى»، «ماسسالىق بۇلىك تۋدىردى» دەگەن سەكىلدى ەڭ اۋىر ايىپتاردى تاعىپ وتىر.

“The Qazaq Times”