دونالد ترامپ اقش پرەزيدەنتى قىزمەتىنە كەلگەننەن كەيىن ورتا شىعىستاعى اقش-تىڭ ستراتەگيالارىن جاڭارتىپ، اسكەري ارالاسۋلاردى ازايتاتىنىن مالىمدەگەن. بۇل ۋادەسىنىڭ جالعاسى رەتىندە اۋعانستان مەن سۇرياداعى امەريكالىق اسكەرلەردى شىعارۋدىڭ بىرنەشە قادامىن دا جاساعان بولاتىن. الايدا، ورتا شىعىستاعى اسكەري ىقپال ماسەلەسىندە اق ءۇي مەن پەنتاگون پىكىر بىرلىگىندە ەمەس ەكەنى وسى ەلدىڭ ءسۇريا مەن اۋعانستانداعى ارەكەتتەرىنەن كورىنىپ وتىر.

ءبىر كۇن بۇرىن پەنتاگون تارابى اقش ورتا شىعىستاعى اسكەري مۇمكىندىكتەرىن ساقتاپ قالۋعا مۇددەلى ەكەنىن ايتتى. اقش ارمياسى ورتالىق قولباسشىلىق باس شابىنىڭ گەنەرالى مارك ميللي ءوز مالىمدەمەسىندە ورتا شىعىستا اقش اسكەرلەرىن ساقتاپ تۇرۋ جانە ونداعى قاۋىپسىزدىك مۇمكىندىكتەرىن ارتتىرۋ ۇلتتىق قاۋىپسىزدىك ستراتەگياسىنىڭ تالابى ەكەنىن ايتتى.

اقش اسكەري شەندىسىنىڭ مالىمدەۋىنشە ءسۇريا جەرىندە اقش-تىڭ 600-دەن اسا جاۋىنگەرى قالادى. پەنتاگوننىڭ ايتۋىنشا، ءسۇريادا قالدىرىلعان اقش اسكەرلەرى ەلدە لاڭكەستىك توپتاردىڭ قالدىق كۇشتەرىمەن كۇرەستى جالعاستىرا بەرەدى.

اقش-تىڭ ورتا شىعىس ەلدەرىندە اسكەر ورنالاستىرۋى رەسەي، يران سەكىلدى وڭىردەگى ىقپالىن كەڭەيتۋدى ماقسات ەتكەن ەلدەر ءۇشىن ۇنامسىز. يران قورعانىس وكىلدەرى اقش-تىڭ اۋعانستانداعى جانە سۇرياداعىيا ارەكەتىن ارانداتۋ رەتىندە كورسەتۋگە تىرىسادى. بۇل رەتتە يران تارابى اقش-تىڭ 2001 جىلى اۋعانستاندا قاۋىپسىزدىك ورناتۋدى ماقسات ەتكەن ارەكەتتەرىنەن كەيىن اۋعانستان جاعدايىنىڭ ءتىپتى دە قيىنداي تۇسكەنىن العا تارتادى.

“The Qazaq Times”