گەرمانيا باستاعان ون شاقتى ەلدە اباي ەسكەرتكىشى تۇرعىزىلماق

وزبەكستانداعى قازاقستان ەلشىلىگىنىڭ الدىنداعى اباي ەسكەتركىشى. فوتو: دانيار بوزوۆ

2020 جىلى قازاقتىڭ ۇلى اقىنى ابايدىڭ ەسكەرتكىشى الەمنىڭ بىرقاتار ەلىنىڭ استاناسىندا ورناتىلماق.

قر سىرتقى ىستەر مينيسترلىگى ءباسپاسوز قىزمەتىنىڭ تاراتقان مالىمەتى بويىنشا، سىرتقى ساياسات ۆەدومستۆوسى قازاق اقىل-ويىنىڭ الىبى ھاكىم ابايدىڭ 175 جىلدىق مەرەيتويى قاراساڭىندا اۋستريا، يتاليا، گەرمانيا، بولگاريا، رەسەي، گرۋزيا، ءۇندىستان، لاتۆيا، موڭعوليانىڭ باس قالالارىندا قازاقتىڭ ۇلى اقىنىنىڭ ەسكەرتكىشىن ورناتۋ ماسەلەسىن قولعا العان.

«وسى رەتتە قازاقستاننىڭ رەسەيدەگى ەلشىلىگى 2006 جىلى ماسكەۋ قالاسىندا اشىلعان اباي ەسكەرتكىشىن زامان تالابىنا ساي وزگەرتىپ، جاڭا ۇلگىدە قايتا جاساپ ورناتۋ تۋرالى ۇسىنىس ەنگىزىپ جاتىر. مادەنيەت جانە سپورت مينيسترلىگى مەن شىعىس قازاقستان وبلىسى اكىمدىگى شەتەلدەردە ۇلى اقىننىڭ 8 ەسكەرتكىشىن ورناتۋعا اتسالىسۋىن سۇرايمىز»، – دەلىنگەن مينيسترلىك اقپاراتىندا.

بۇعان دەيىن اقوردادا مەملەكەتتىك حاتشى قىرىمبەك كوشەرباەۆتىڭ توراعالىعىمەن ابايدىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسى وتكەن بولاتىن. سول جيىندا 2020 جىلدىڭ 8 قاڭتارىندا ەلورداداعى «قازاقستان» ورتالىق كونتسەرت زالىندا حاكىم ابايدىڭ 175 جىلدىق مەرەيتويىنىڭ باستالۋىنا ارنالعان سالتاناتتى شارا وتەتىندىگى بەلگىلى بولعان ەدى.