كەشە فرانتسيا پرەزيدەنتىنىڭ قىتايداعى ساپارى اياقتالدى. پرەزيدەنت ماكرون قىتايمەن قۇنى 15 ملرد دوللار كولەمىندە كەلىسىمشارتقا قول قويدى. كەلىسىم اۆياتسيا، ەنەرگەتيكا جانە اۋىلشارۋاشىلىق سالالارىن قامتيدى. فرانتسۋزدىڭ 20 كومپانياسى قىتايعا ەتتى نەگىز ەتكەن اۋىلشارۋاشىلىق ونىمدەرىن ەكسپورتتاۋعا مۇمكىندىك الدى.

فرانتسۋز بەن قىتاي باسشىلارى اراسىنداعى كەزدەسۋدە ەكى ەلدىڭ جان-جاقتى قارىم-قاتىناسىن دامىتۋ تۋرالى كوبىرەك ءسوز بولعان. ىسكەرلىك توپتار اراسىنداعى كەزدەسۋدە ەكى ەلدىڭ اۆياتسيا مەن ەنەرگەتيكا سالاسىنداعى اۋقىمدى ورتاق جوبالار قۇرعانىن كورۋگە بولادى. ايتالىق، اۋە كومپانيالار اراسىنداعى ىنتىماقتاستىق پەن يادرولىق وتىندى تازارتۋ، پايدالانۋ باعىتىندا قىتاي مەن فرانتسيانىڭ ءىرى-ءىرى كومپانيالارى اراسىندا كەلىسىمدەر جاسالعان.

شىنىن مانىندە، ادام قۇقىعىن قورعاۋشى حالىقارالىق ۇيىمدار ماكروننىڭ قىتاي ساپارىنان كوپ ءۇمىت كۇتتى. ايتالىق، Human Rights Watch ۇيىمى ماكروننىڭ قىتاي ساپارىنان بىرنەشە كۇن بۇرىن ارنايى حات جولداپ، قىتايدا اۋىر دارەجەدە بۇزىلىپ وتىرعان ادام قۇقىعى ماسەلەسىن كوتەرۋ تۋرالى ۇسىنىس ەتكەن. پرەزيدەنت ماكروننىڭ ادام قۇقىعى ماسەلەسىندە باتىلدىق تانىتىپ، قىتايداعى مۇسىلمان ازشىلىقتارىن، بەلسەندىلەردى قۋدالاۋ، قاماۋ ىستەرىن توقتاتۋعا شاقىرۋدى تالاپ ەتكەن. ماكرون ساپارى كەزىندە، حالىقارالىق ۇيىمداردىڭ ىقپالىمەن قىتايداعى ادام قۇقىعى ماسەلەسى، اسىرەسە شىنجاڭ ماسەلەسى كوتەرىلۋى مۇمكىن دەگەن حابارلار دا بولعان.

الايدا، رەسمي كەزدەسۋلەر تۋرالى تارالعان مالىمەتتەردەن بۇل تاقىرىپتاردى تابا المادىق. بايقاعانىمىز – اقش-قىتاي اراسىنداعى ساۋدا سوعىسىنا بايلانىستى قىتايدىڭ تارىعىپ تۇرعان اۋىلشارۋاشىلىق ونىمدەر نارىعىنا الىس ەۋروپادان فرانتسۋز كومپانيالارى كوز تىگىپ وتىرعانى. ولار اقش-تىڭ توسقاۋىلعا ۇشىراعان ونىمدەرىنىڭ قىتاي نارىعىنداعى ورنىن يەلەنۋگە تىرىسىپ جاتقانىن كورەمىز.

“The Qazaq Times”