اقش پرەزيدەنتى دونالد ترامپ تۇركيالىق ارىپتەسى رەجەپ تايىپ ەردوعانمەن تەلەفون ارقىلى سويلەسىپ، 13 قاراشادا ۋاشينگتوندا رەسمي كەزدەسۋ وتكىزەتىنىن ايتتى.

ترامپ ءوزىنىڭ Twitter پاراقشاسىندا: «تۇركيا پرەزيدەنتىمەن وتە جاقسى سويلەستىك. ول ماعان كوپتەگەن تەرروريستىك توپتاردىڭ سونىڭ ىشىندە تەرروريستىڭ ايەلى مەن اپكەسىنىڭ [ابۋ باكر] ۇستالعانىن حابارلادى. ءبىز سۇرياداعى قاقتىعىس كەزىندە قاشىپ كەتكەن ءال-باعدادي، تۇركيا مەن سيريا شەكاراسىنداعى قاقتىعىستار، تەرروريزمدى جويۋ، كۇردتەرمەن ارازدىقتى توقتاتۋ جانە باسقا دا ماسەلەلەردى تالقىلادىق. مەن كەلەسى سارسەنبىدە، ياعني 13 قاراشادا پرەزيدەنت ەردوعاندى كۇتەمىن»، — دەدى.

17 قازاندا اقش پەن تۇركيا اسكەري وپەراتسيانى توقتاتۋ تۋرالى كەلىسىمگە كەلگەن. ترامپ تاراپتار ءوزارا كەلىسىمگە كەلگەننەن كەيىن تۇركيا سۇرياداعى كونترتەرروريستىك وپەراتسياسىن توقتاتقانىن ايتقان. «قاشىقتىعى 20 ميل (32 شاقىرىم) بولاتىن قاۋىپسىزدىك ايماعى قۇرىلدى» – دەگەن اقش پرەزيدەنتى ءسۇريا-تۇركيا شەكاراسىندا وق اتۋ توقتاتىلىپ، جاعدايدىڭ تۇراقتالعانىن ءمالىم ەتتى. تاراپتار ورتاق كەلىسىمگە كەلگەن سوڭ، ۋاشينگتون انكاراعا ەنگىزىلگەن سانكتسيانىڭ كۇشىن جويدى.

22 قازاندا رەسەي مەن تۇركيا پرەزيدەنتتەرى سوچيدە وتكەن كەزدەسۋدە ءسۇريانىڭ سولتۇستىك-شىعىسىنداعى جاعدايدى رەتتەۋ بويىنشا بىرلەسكەن ارەكەتتەر تۋرالى مەموراندۋم قابىلدادى. كۇرد قارۋلى كۇشتەرىنە 29 قازاندا تۇركيا شەكاراسىنان وڭتۇستىككە قاراي 30 شاقىرىمدىق ايماقتى تولىعىمەن بوساتۋ تاپسىرىلدى. ۋلتيماتۋمنىڭ اياقتالعان كۇنى رەسەيدىڭ قورعانىس ءمينيسترى سەرگەي شويگۋ كۇرد قارۋلى قۇرىلىمدارىنىڭ قاۋىپسىزدىك ايماعىنان شىعارىلۋى مەرزىمىنەن بۇرىن اياقتالعانىن حابارلادى.

ەستەرىڭىزگە سالا كەتەيىك، 9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ. انكارانىڭ جوسپارىنا سايكەس سۇريالىق بوسقىندار وسى ايماقتان تۇركياعا ورالا الادى. رەسمي داماسك بۇل وپەراتسيانى اگرەسسيا دەپ اتادى، ال حالىقارالىق قاۋىمداستىقتار انكارانىڭ ارەكەتىن ايىپتادى.

"The Qazaq Times"